CM9反擊戰雙鏡出海

40流明亮度投影

提起雙鏡相機，大家或許會諗起Rolleiflex等型號，但對內地資深影友而言，海鷗才是雙鏡國產機的名牌。以前的雙鏡機，上鏡用作取景和對焦，下鏡才負責拍照，來到數碼版CM9，基本上對焦、取景、影相都係下鏡頭做晒，至於上鏡頭就增設投影功能，提供854×480解像度及40流明亮度，可以畀你隨時投影相片或影片，一大班人共享快樂時光。不過估唔到機身底部藏有遙控器，投影時可用作播放、停頓等功能，玩味甚濃。

3.8倍變焦鏡頭

CM9用上一支24~90mm的3.8倍變焦鏡頭，支援F1.4超大光圈，以便營造淺景深效果，更可以1cm近距離進行微距拍攝，另一有趣之處係機旁的變焦桿似足以前菲林機的過片鈕，連操作都充滿復古味道。想玩出唔同風格，新機有成11款濾鏡特效咁多，例如黑白、玩具相機、全景等效果都有齊。另引入大熱的Wi-Fi功能，利用《海鷗相機》App不僅能以手機作遙控拍攝，亦可無線傳送影像，讓用家影完相即刻Share到社交網絡。

雙層轉盤用作調校曝光模式和設定，還加入變焦桿。	上鏡頭其實係投影器，而閃光燈下方備有散熱氣孔。	頂部設有2.4吋46萬像素屏幕，用作腰平取景。

雙屏幕設計過癮

雖然新機保留了復古外形，但數碼化做得相當出色，尤其係頂部和背面同樣設有屏幕，頂部2.4吋46萬像素屏幕讓用家可作腰平取景，至於背面4.3吋92萬像素屏幕則支援觸控功能，能夠篤芒選擇拍攝設定和重播影像。不過大家唔好諗住新機用番中片幅設計，其實內裏採用1,000萬像素1/1.7吋CMOS，可能為了遷就垂直屏幕嘅關係，影出來張相會變為直度，最離奇係拍片時會自動轉做橫度，仲支援1,080p全高清質素呢！

底部收納了遙控器，不僅能遙控影相，甚至能調校投影功能。	CM9附有豪華包裝盒、皮革相機套和皮革頸帶，送禮自用一流。	投影鏡頭的質素唔算高，不過環境夠黑的話都睇得清楚。
備有11種濾鏡特效，可以玩出唔同風格。	提供6種場景模式如家庭、食物等，輔以文字解說。	Rainbow Store Online負責人Peter
試相區 使用黑白濾鏡和1:1比例拍攝，相片灰階表現不俗，暗位層次似足菲林風格。	試相區 雖然相片像素唔算高，但線條結實，加上鏡頭焦段實用，Snapshot冇難度。

用家有Say

Rainbow Store Online負責人Peter表示：「我早前喺北京P&E展覽會，見到CM9外形吸引，加上自己本身係海鷗用家，就一口氣入咗5部，其中1部自用。以前海鷗雙鏡機係用6×6的120菲林格式，而CM9的1:1比例配合黑白濾鏡影出嚟嘅效果幾似；再者今次加入投影功能，去旅行睇相時可以立即投影出來。唯一唔同係以前設有棱鏡，所以腰平取景的畫面會上下和左右掉轉，數碼化之後就變番正常。」

規格表

感光元件：1,000萬像素CMOS

焦　　距：24~90mm

光　　圈：F1.4~2.3

感光度：ISO 100~1,600

屏　　幕：2.4吋46萬像素（頂部）、4.3吋92萬像素（背部）

體　　積：120×70×70mm

重　　量：780g

撰文：黎子豪　

攝影：陳世昌

查詢電話：2310 1808