便攜耳擴　萬元靚聲王

咁啱場內返咗兩款萬元左右嘅便攜耳擴，ALO Continental Dual Mono以真空管加強圓潤感VentureCraft Vantam限定版加入Vishay薄膜電阻提升分析力。雖然定價五位數字聽落都幾乸脷，但試聽過之後真係返唔到轉頭。

ALO Continental Dual Mono雙膽設計

相信好多人同機Gor一樣，見到ALO Continental Dual Mono有兩支真空管都覺得架勢，話晒玩膽嘅便攜耳擴並唔多。而且真空管能獨立處理每條聲道，型號嘅「Dual Mono」就係咁解。廠方話兩支真空管要做到平衡同等電壓差絕對唔易，好在ALO呢間美國廠出開線材和耳機，以自動偏置調整線路解決問題。另一特色是有齊平衡輸入/輸出，接駁平衡耳機出街享受靚聲冇難度之外，就算放喺屋企做DAC解碼都好有水準。

ALO Continental Dual Mono機底備有輸入選擇桿。	機身內置兩支真空管，獨立處理每條聲道。	白色限定版Vantam全球限量130部，香港及中國分得40部並刻有獨立編號。
機底設有USB介面，可以數碼方式接駁流動裝置。

VentureCraft Vantam白色限定

好多音響舖老友近排同機Gor推薦日本VentureCraft嘅便攜耳擴，機Gor見到Vantam白色限定版後，雖然拎上手膠感有點重，但白撞紅色又幾靚仔。其實廠方向來以推出特別版作銷售策略，呢一招有利亦有弊，好嘅方面係部機愈出愈勁，好似今次嘅白色限定版用咗Vishay電阻，能夠提升全頻分析力，同時換上已停產嘅軍用級627SM運放；但弊在特別版出得太密，原版都未去得切，限定版又忽然殺到，令客人無所適從。

ALO Continental Dual Mono（左）明顯較VentureCraft Vantam（右）大上一個碼，帶出街冇咁方便。	Continental Dual Mono透過Audio線接駁手機或播放器便能提升音色。	WIN VentureCraft Vantam可直接透過Lightning線接駁iPhone使用。

第一回合：鬥便攜接駁

便攜耳擴作為隨身Gadget，其中一個重要元素梗係要便攜！將兩部耳擴拍埋一齊，已發覺Continental Dual Mono身形明顯大Vantam白色限定版兩個碼，若果駁埋手機或Hi-Res播放器聽歌，真係擺唔到落褲袋。接駁方面，兩機都備有USB及3.5mm Audio插口作音訊輸入，Vantam特別之處是兼容iDevice，只要配多條7N Lightning銅線，便可直駁iPhone或iPod聽歌，啱晒機Gor呢類果粉使用。

DRAW 播放CD質素的 流行曲，Continental Dual Mono在人聲表現出眾。

播放高解析度音訊，機Gor覺得Vantam限定版嘅鼓聲分析力較細緻。

第二回合：鬥音色靚聲

音色係揀選耳擴嘅重要一環，今次機Gor以AK Jr高清播放器，試聽16-bit 44.1kHz的CD質素音樂和24-bit 96kHz嘅DSD高清音樂，發覺Continental Dual Mono擁有一貫膽機風格，音色圓潤兼人聲溫暖，完全飛甩咗數碼音樂嘅生硬感。至於Vantam白色限定版嘅分析力好強，聲音非常細膩，每粒音都清澈乾淨。咁邊種風格好啲？既然係魚與熊掌之選，今個回合就打和啦！

WIN ALO Continental Dual Mono能充當CAS的DAC解碼，實試解碼DSD檔案表現良好。

Vantam限定版的機背設有多項功能選擇掣，一啪掣便可將音樂自行升頻至 32-bit 384kHz。

第三回合：鬥特異功能

Vantam白色限定版可說是針對iPhone、iPod等iDevice而設計，接駁Lightning線後喺機背啪掣，即可將音訊升頻至32-bit 384kHz高清質素，花巧嘢多多幾啱年輕一族。至於實際功能方面，Continental Dual Mono走音響發燒友路線，在每個放大階段都提供線性變換器，令擴音表現穩定兼低噪，擺喺屋企玩CAS（Computer Audio Source）充當DAC解碼亦相當稱職，一物二用。

達人教路

Lyra Media主編Cato Mak：「如ALO Continental Dual Mono這類膽管耳擴，比一般使用原子粒Op-Amp的便攜耳擴，最大分別是前者音色會甜啲，背景音樂圓滑啲，人聲又會暖啲。好難講用真空管會好過用原子粒，又或者Op-Amp嘅分析力比膽管好，要視乎各人嘅聽歌喜好。」

機Gor Report：Classic Vs Pop 聽歌風格有別

兩款便攜耳擴嘅取向明顯有別，ALO Continental Dual Mono由內到外都以音色作賣點，更為了加設真空管而犧牲外形與體積。相反VentureCraft Vantam在纖巧尺寸下加入高規格元素，玩盡32-bit 384kHz升頻音色。其實兩機各有賣點，但機Gor認為若各位鍾意聽懷舊金曲或演奏會的話，前者將會提供膽機級數嘅靚聲；若喜歡Pop或Rock數碼音樂的話，後者定能滿足樂迷需要。

撰文：機Gor

查詢電話：（a）3188 0767、（b）3586 1811