Nerfare膠彈喪射無痛槍戰

論最刺激嘅槍類遊戲，Wargame必入三甲，槍林彈雨下狙擊敵人雖然爽爆，但被氣槍射中隨時見紅，始終唔啱女仔玩。想無痛享受Wargame快感？除了早年興起以彩彈、雷射玩槍戰外，本地團體Awesomer設計嘅Nerfare一樣咁刺激，由於它改用發泡膠彈，就算近距離射中都唔覺痛，盡情互片喪射再冇顧慮！

無懼日曬雨淋

其實Nerf嘅發泡膠彈槍已推出了一段時間，但卻沒有一個具體嘅槍戰規則，所以本地互動遊戲團體Awesomer與Nerf開發商合作，設計出一系列Nerfare遊戲。同Wargame一樣，Nerfare採用隊制形式作戰，人數由最少4 Vs 4到最多10 Vs 10，場地大多選用室內運動場或足球場，夏天都唔使怕日曬雨淋，歎住冷氣玩自然舒服得多。場內則分為兩邊陣營，各自擺放唔同嘅吹氣碉堡，而中間位置就會劃為戰鬥區。

3大角色合作

分好隊伍、設置場地後，便可戴上保護眼罩及穿着護膝準備開戰。Nerfare特別之處係以故事形式進行，首先「資源爭奪戰」要鬥搶戰鬥區內嘅能源球；遊戲內設有Commander（指揮官）、Engineer（工程師）或Marksman（神射手）3個角色，各玩家均有指定活動範圍及不同膠彈槍。以Marksman為例，玩家不可走入戰鬥區，只可於自己陣營內作遠距離攻擊，因此將會分配射程較遠嘅大槍。

場地空間唔算好大，Engineer要不斷穿梭運送能源球。

比賽時要着背心識別隊伍及角色，另要帶眼罩、護膝作保護。

場地會擺放不同吹氣碉堡，掩護靠晒佢！

小記現場試玩時，發覺Engineer角色尤其重要，皆因只有他才可走進戰鬥區收集能源球帶返基地，又或者於戰鬥區內執子彈替隊友補給，可以話係勝負關鍵人物，所以最好揀跑得快、身手敏捷嘅隊友擔任；要留意的是他只能揀攻擊力較弱的細槍，所以隊友的掩護不可或缺。而Commander便是制訂作戰策略的大腦，既要與裁判溝通，又要分配隊員搶攻。

玩家可自備Nerf槍上陣，惟各個角色所用的槍械威力需由裁判檢定。

膠彈以發泡膠製造，又輕又軟，近距離擊中都唔痛。

Nerf最新Modulus系列ECS-10半自動步槍，玩家可另購升級套裝，組合出1,000個形態。售價：$549.9

Nerf最新Modulus系列ECS-10半自動步槍，玩家可另購升級套裝，組合出1,000個形態。售價：$549.9

攻防戰射大旗

玩完搶奪資源後，會即時進行「正面交鋒」，玩家要鬥射中設於敵陣嘅大旗目標，擊中次數較多者為勝。勝方可於「司令部攻防戰」成為進攻隊伍，另一隊則作防守，而場上吹氣雕堡會重新執位，形成一個攻守陣勢。攻方基地內只會有一個大旗目標供對手攻擊，而守方基地則有兩個大旗目標，所以攻方會較為着數，亦考驗守方的戰術運用。若玩家被擊中，除咗要原地放低手上嘅膠彈，仲要即時返回基地，10秒之後才能重返戰場。每節交鋒均限時5分鐘，所以遊戲節奏超快，完全冇悶場！