Suunto Vs Garmin GPS運動「錶」準
隨住街馬、跑山、三鐵等運動喺香港興起，令一些可量度心跳、記錄GPS嘅專業運動手錶殺出新血路。機Gor跑齡雖短，但輸人唔輸陣，點都要裝備行先，所以今次找來Suunto Ambit3 Sport HR及Garmin Fenix 3兩大GPS手錶詳測。究竟邊隻「智」啱跑友？即刻操番轉啦！
Ambit3 Sport HR系出名門
芬蘭品牌Suunto成立於1936年，以生產高精密度潛水、訓練及戶外運動用品見稱，早於1998年已推出專業運動錶Vector系列！新一代Ambit3 Sport HR，備有大熱嘅紅、藍、黑、白等顏色選擇，比起同期推出的Run系列，它除了可記錄跑步資訊外，還提供游泳及踩單車監察能力，而且心跳帶落水後依然可記錄心跳，唔怪得香港三項鐵人代表司徒兆殷咁Buy佢。
Fenix 3 成功轉型
美國品牌Garmin近年成功轉型，業務由汽車導航系統，轉為運動型穿戴裝置。當中Fenix 3用上圓形錶面設計，配以藍寶石抗刮屏幕及不銹鋼和膠錶帶，無論外形或質感都勝過同廠Forerunner系列。記錄功能方面亦強化唔少，從慢跑、登山、滑雪到三項鐵人都囊括其中，甚至可量度睡眠質素，連德國越野跑手Peter Schlickenrieder都係佢嘅擁躉之一。
第1回合：鬥操作易讀
Ambit3只有128×128解像度黑白畫面，Fenix 3 則備有218×218解像度彩色屏幕，規格睇落冇得鬥。但機Gor實際在陽光下測試，發覺Ambit3的黑底白字及大字體更加易讀；Fenix 3由於用了防刮的藍寶石屏幕，令反光問題時有出現。不過Fenix 3操作方面就加番分，它用上左三右二按鍵設計，用落似傳統運動錶，好易上手；而且用家可選擇顯示數據，一目了然。Ambit3按鍵擺位則需要重新適應，加上數據要按掣逐層睇，睇起嚟冇咁方便。
第2回合：鬥軟件支援
作為專業運動手錶，當然要提供埋數據分析。兩錶均可將資料同步至手機App及官網，Ambit3用的是Movescount，Fenix 3則稱作Connect平台。兩者均可提供高度、步速、心跳率、溫度及卡路里等資訊，並可按時間、圈數或分段劃分結果。然而機Gor更喜歡Ambit3提供的Suunto Movie功能，可把GPS路徑製成立體短片，跑友更可加入背景音樂後分享，令運動變得更有趣！
第3回合：鬥接收能力
兩隻手錶都能上山下海，齋鬥操控和功能模式意義不大，更多人想知佢嘅GPS定位有幾準。今次機Gor特別行麥理浩徑第八段上大帽山，基本上兩隻錶首次接收速度相若，Ambit3需要15秒，Fenix 3則要17秒，但可能Garmin以GPS裝置起家，加上Fenix 3又具備雙衞星定位（GPS及GLONASS）技術，最後得出的海拔高度及距離更貼近現實；相反Ambit3部分位置跳得比較厲害，誤差接近100米，準確性明顯不及對手！
達人教路：香港三項鐵人代表司徒兆殷︰「有助改善成績！」
「兩年前港隊為提升運動員表現，開始引入GPS手錶。用了一段時間後，發覺練習時有助Control Performance，知道快慢同何時留力，對改善成績好有幫助。至於選購時最重要清楚自己需要，例如我玩三鐵，要隻錶防水兼定位快；若果只係玩跑步，就無謂花費額外金錢買防水型號，應着重佢嘅計圈能力。另外，GPS定位好受天氣影響，落雨及大霧時會令接收變差呢！」
機Gor Report：Suunto分析清晰 Garmin數據精準
Suunto及Garmin皆是GPS手錶中的翹楚，旗下Ambit3與Fenix 3自然引來不少跑友討論。經過測試後，機Gor認為前者的閱讀性較佳，加上分析清晰，貼合一般用家需要；後者整體較為專業，GPS數據準確且容易上手，較適合專業跑手使用。最後補充一點，Garmin雖是美國牌子，但產自台灣；Suunto則是芬蘭設計製造呢！
Profile：機Gor
機不離身，不信Spec只信測試，不扮高深，懶理低俗，貪新不忘舊。
Ambit3 Sport HR 規格表
屏幕︰1.1吋（128×128解像度）
GPS續航力︰15至100小時
防水深度︰50米
其他功能︰加速度計、高度計、指南針
體積︰50×50×15.5mm
重量︰80g
Fenix 3 規格表
屏幕︰1.2吋（218×218解像度）
GPS續航力︰20至50小時
防水深度︰100米
其他功能︰加速度計、高度計、氣壓計、溫度計、指南針
體積︰51×51×15mm
重量︰85g
撰文：機Gor
查詢電話︰（a）3582 3688、（b）3568 3786