美國E3直擊！Xbox One新作列陣HoloLens戴頭試玩Halo 5
今年Xbox在美國E3電玩展排出強勁遊戲陣容，幾乎所有自家大作都有列陣，除主打的《Halo 5: Guardians》（簡稱Halo 5）之外，新一集《Gears of War 4》將於2016年推出；另有加入落雨系統的《Forza Motorsport 6》及羅拉變得更索的《Rise of the Tomb Raider》。不過淨係用手掣打機係唔夠嘅，今年廠方出動AR眼鏡HoloLens試玩，型到爆燈！
Gears of War 4 明年推出
今年另一重頭戲係《Gears of War: Ultimate Edition》高清重製版，在場內當然有得試玩，經過1,080＠60p高清處理後，遊戲畫質大大提升。此外，《Gears of War 4》在展前發布會亦公布首段遊戲片段，男女主角在黑暗古堡中跟巨型怪物決戰，感覺有幾分似《BioHazard》，不過遊戲預計要到2016年底才推出，粉絲有排等啦！
賽車新作《Forza Motorsport 6》在場內則設有三屏幕駕駛台供試玩，甚至連遊戲封面的藍色Ford GT跑車亦運到場內展示；遊戲最吸引是加入下雨系統，路面水窪會實際影響到駕駛狀態同路線，當大雨落到擋風玻璃時，雨水更會如真實一樣在玻璃流動。
索爆羅拉獨家冒險
《Rise of the Tomb Raider》作為Xbox平台獨佔遊戲，當然會發大嚟搞，如E3現場搭建了一個超大型雪山模型試玩室，讓玩家體驗羅拉在雪山險嶺搏鬥一幕！《Windows 10》系統將於今年7月底推出，Microsoft亦在E3公布了兩款能於新系統及Xbox One跨平台對戰的遊戲，其一是期待已久的ARPG遊戲《Fable Legends》，另一是新開發的動作遊戲《Gigantic》，後者有趣之處是對戰雙方有巨大守衞者幫手，比起一般對戰遊戲多咗啲Gimmick。
虛擬實境Warzone作戰
在E3展前發布會上，Xbox示範以全新HoloLens玩遊戲，將現實物件與遊戲世界互動。玩法咁創新，小記當然喺電玩展揭幕日，搶先試戴HoloLens玩王牌射擊遊戲《Halo 5: Guardians》。試玩區設於密封的基地內，要排長龍組成12人才能進入，玩的是最新Warzone版圖，由兩個基地嘅用家連線對戰；最特別係入基地前要量度眼睛，原來係為HoloLens調整投射位置，才能戴起這AR裝置睇任務解說。小記戴上後覺得它稍重，但向前後左右移動時，虛擬實境影像既逼真又立體，好似睇緊科幻片一樣。任務解說約5分鐘，然後進行18分鐘Warzone作戰，當中玩家可用上飛行器，於不同地形射殺敵人，緊張刺激兼而有之，排長龍都抵！
新無線手掣登場
想玩Xbox One叻過人除了技術之外，硬件方面同樣重要，今年Microsoft在E3公布了一款專為Pro Gamer而設的新Xbox One無線手掣Elite Wireless Controller。它可以讓用家進行多種設定，如機面方向鍵及操控桿可自行更換、LT及RT鍵可自設鬆緊，連手掣背部都加入P1至P4共4個按鍵，可加入以磁力貼合的把手，針對格鬥遊戲、射擊遊戲及賽車遊戲不同需要。
主機年底更新兼容Xbox 360遊戲
Xbox One一直不兼容Xbox 360遊戲，被唔少粉絲投訴。終於到今年E3，Microsoft公布會推出向下兼容計劃，預計年底前經Update便可玩番好多經典Xbox 360遊戲，仲可用埋Xbox One的錄影同分享功能！
特派記者：布偉倫
鳴謝：Microsoft