首部DOLBY ATOMS手機！A7000戲院隨身

自從Dolby Atmos攻入香港戲院，戲迷都唔介意畀多些少體驗全景聲震撼。不過以後唔使身處戲院，隨時隨地都可享受靚聲，皆因全球首部支援Dolby Atmos音效嘅手機Lenovo A7000，將於6月5日以$1,299低價抵港，以後只要一插耳機即可聽到截然不同嘅環迴立體聲！

Lenovo A7000 售價：$1,299

搶眼檸檬黃色

A7000內地又稱為大樂檬，睇個名相信已估到它是早前A6000樂檬嘅兄弟作，依舊用上直板圓角機身，配色有白色及檸檬黃兩款。最大分別是屏幕由5吋加大至5.5吋，不過只維持1,280×720解像度，幸好對比度、可視角表現不俗。硬件方面則採用八核心處理器、2GB RAM，並支援4G制式及雙卡雙待功能，而前後置鏡頭分別有500萬像素及800萬像素，當中前置鏡頭支援7級美顏之外，還備有眨眼擷取及手勢擷取功能，後者只要揮動手掌或舉起V字手勢，即可啟動自拍倒數，好玩又實用。

杜比全景聲睇片

新機最吸引之處係插上耳機後可玩到Dolby Atmos全景聲，它利用Head-Related Transfer Function（HRTF），藉着大腦判斷聲音發出的方位和距離，營造出空間感。另一關鍵係Dolby Atmos片源可同時傳送多達128個聲音主體（Audio Objects），並設定每個聲音發出位置。小記試播預載試片時，發現360度環迴效果強勁，明顯聽到不同聲音嘅方向定位，令睇片臨場感大增。此外，新機內置《Dolby Atmos》程式，供用家調校不同音效設定，就算依家支援相關技術嘅片源唔多，但音效表現已比傳統手機出眾。