點解過咗10幾歲之後啲時間過得特別快？
人一過咗10幾歲之後，啲時間就好似啪咗瀉藥咁，一瀉千里。
眨下眼20幾歲，眨下眼又30幾歲，再眨眼就40幾，眨多眼就50幾，再眨多幾下，都差不多要死。
子華神幫電訊商拍嗰個廣告，話做人咩都要快。
我呸！係，好多時做咩都要快，但唔係我哋想o架，係個世界逼成o架！（電視劇奸角口脗）
時間太少，想做嘅嘢有一大堆，我哋先惟有將自己嘅Schedule塞到爆。
至於點解過咗10幾歲先會有呢種時光飛逝嘅感覺，有兩個主要原因：
第一，可能你Short咗而不自知。
第二，已故心理學家 William James喺佢嘅著作《The Principles of Psycho唔識串》入面指出，感覺時間快或慢，係取決於生活上記憶點嘅多寡。唔明？咁等我講番法文：細個嘅時候，有好多第一次出現，第一次返學，第一次識朋友，第一次罰企，第一次記缺點，年年都有新老師，年年都有新同學，雖然課堂係重複，但每年讀嘅嘢接觸嘅嘢都唔同。仲有第一次暗戀，第一次拍拖，第一次錫錫，第一次啪啪（I Mean鼓掌），第一次失戀，鑊鑊新鮮，鑊鑊瘋癲。你可以清晰分到每一年嘅不同，於是回想起呢段豐富嘅學校時光，你感覺特別充實而漫長。
換句話說，你感覺時間過得愈嚟愈快，係因為你已經失咗身，冇晒啲第一次。
網址：www.facebook.com/linrixi