米高基頓現真身1:6 Batman Returns

簡約戰甲物料

今時今日蝙蝠俠型得咁緊要，實在多得鬼才導演Tim Burton！佢未接手之前，蝙蝠俠例牌穿灰色衞生衣，打架時仲會有「Boooom!」仿漫畫字樣，騎呢到爆。導演遂找來Michael Keaton，為蝙蝠俠注入深度，令大家明白英雄除咗識得捉壞人之外，原來仲可以同貓女談情說愛。

1992年版蝙蝠俠戰衣以跑車為設計概念，整體更富現代感，廠商用上搪膠為物料，既能忠實還原戰甲線條，還能解決舊膠料常見嘅出油同熔膠問題。

戰甲改用搪膠提升耐玩度，黃色腰帶藏有磁石，可吸實部分配件。	當年Batman Boots以AJ VI為設計藍本，廠商忠實保留下來。	蝙蝠頭備有3個可換表情，配合轉眼系統更顯逼真。

另外，上代被彈難以扭出造型嘅斗篷，今次改用PV料製作，下墜感較強，配合4支鐵線骨架，輕力便可扭出飄逸效果。有讚有彈，由於面罩同上身肩甲連為一體，Figure條頸硬晒郁唔到，幸好附送3款替換表情，配合可動眼球系統，表情要幾Chok有幾Chok！

套裝送埋破爛肩甲同面罩，好讓玩家換上真人頭雕。	配件數量都幾大堆頭，全部造工精美。	造型手掌有9隻，表面附有皮手套紋理。

一頭雕兩造型

今次Figure分單裝及套裝發售，前者得一隻蝙蝠俠，後者則送埋Michael Keaton頭雕、踢死兔禮服及破爛肩甲。雖然由Jong Hyuk Park及Yong Kyum Kim聯手操刀嘅頭雕，神似度只算一般，但畀多$800有齊風度翩翩嘅Michael Keaton同撕爛面具造型，計落點都划算！當然，配件大堆頭亦好有吸引力，有齊繩索槍、Batmobile遙控器、探測蝙蝠飛鏢、索鈎槍等，加上DX系列專用射燈地台，真係又玩得又擺得。

今代斗篷的線條更突出，下墜感更強。

Michael Keaton頭雕配踢死兔禮服，絕對風度翩翩。

撰文︰陳志滔

攝影︰蔡浩文

查詢電話：3722 3988

＊圖片所示乃產品原型，與最後完成產品或有少許分別。