東京可以Hea的話不會郁

「佢低調，但係受萬人景仰！」除咗食神，呢番話，同樣適用於人稱「蛋黃哥」的「梳乎蛋」！點解？事關2013年出道的梳乎蛋，未夠一年，經已躋身Sanrio最受歡迎角色大選第7位，憑着懶到出汁的性格，爆紅於港台日，精品店及Pop-up Cafe開滿街，我在東京見識到本尊的威力後，莫講話打稿，直頭想即席熄機收工啊！

梳乎蛋Pop-up Cafe推出超過20款食品，單是手信都已經揀到手軟。

全天候通街梳乎

梳乎蛋之所以這麼入屋，除有賴網民支持，還在於TBS電視台每日都會播出一小節「梳乎蛋」專屬節目，他的口頭禪「甚麼也不做」及趴在蛋白上扭屁股的懶散樣，已被視為經典，不過亦有網民以另一角度欣賞他隨遇而安的心態，縱然成為桌上美食，依然處變不驚，說到底，大家還是對其懶懶散散個衰樣又愛又恨。

電視台旗下的TBS Store睇準時機，推出多款精品，例如在晴空塔的TBS Store總店，店方便設置電視機，不停播放梳乎蛋卡通片，引導大家盡情Shopping，人人望住死蛇爛鱔般的梳乎蛋印印腳，並用呆呆聲線講話，連男士也高呼Kawaii！至於貨品種類，食玩買樣樣齊，最誇張的是衝着死忠而設計的Tee、睡褲和潤唇膏，其餘還有鎖匙扣、食品、公仔、玩具、文具杯碟和餐具等超過20款，講得出都有，而身旁又總會有人講Kawaii-ne，所以話雖然產品主題係懶散，但就令粉絲好積極，TBS真係好邪惡。

放大圖片

店方不時播放梳乎蛋卡通片，引導大家盡情Shopping。

相信是梳乎蛋的死忠才會購買的Tee！

可愛到睇見食唔落

精品店隔籬便是梳乎蛋的Pop-up Cafe，利申，本人一向好雞蛋，但今次真係食唔落，皆因梳乎蛋實在太可愛！Cafe開業僅3個月，捧場客非常多，不時出現長長人龍，美中不足的是地方太細，堂食座位僅3桌。梳乎蛋菜式有蝦餅煙肉蛋、玉子燒、玉子火腿壽司及白玉雪糕新地，數量唔多，勝在造型搭夠。

躺在多士上的梳乎蛋神情依然懶散，十分搞笑，鎖匙扣￥1,242（約HK$80）。

杯碟餐具最受學生哥及家長歡迎，梳乎蛋碟￥1,512（約HK$97）。

單是文具已買到破產，檔案夾￥250（約HK$16）、簿￥429（約HK$27）及原子筆￥594（約HK$38）。

單是文具已買到破產，檔案夾￥250（約HK$16）、簿￥429（約HK$27）及原子筆￥594（約HK$38）。

梳乎蛋分別以太陽蛋及玉子蛋面目示人，看着其「Hea」爆表情經已哭笑不得，到真正要食的時候，實在不知如何「入手」，所以食店於桌上附設「進食簡介」，圖文並茂提示大家可將兩塊蝦餅，底面夾實隻衰蛋來享用，終於成功吞進腹中後，脆口蝦餅與流心蛋黃及燒汁蔬菜同吃，好味就當然，但Fans們最緊張的還是相機食得飽唔飽！食店特別提供炸雞及啤酒，邊飲酒、邊食炸雞、邊吹水，超越梳乎蛋的「Hea」爆境界，原來唔難。