PoolSoccer踢球入洞雙腳變Cue棍

電影《食神》入面，星爺將瀨尿蝦同牛丸兩樣九唔搭八嘅嘢撈埋一齊，創製出爆漿瀨尿牛丸。原來運動界一樣有過癮嘅Crossover，講緊嘅係外國興咗一排、最近引入香港嘅PoolSoccer，顧名思義係美式桌球同足球嘅混合體，篤波唔使用Cue棍，靠雙腳踢波入洞攞分，仲可以腳趾尾拉西，自問球技精湛的話定要挑戰一下！

加大版桌球枱

將PoolSoccer引入香港嘅BALL ROOM負責人Samuel表示：「有傳法國有對夫婦，一個鍾意足球，一個鍾意桌球，為咗可以兩公婆一齊玩，萌起將兩者融合嘅念頭。」PoolSoccer嘅場地外形似加大版桌球枱，實木框架、6個袋口位、綠色絨氈，只是面積增至6×3米。波枱變大，連帶15個顏色波加白波都以特製足球代替，Size同3號足球接近，但表面印上同美式桌球一樣嘅號碼、顏色和花紋；而且重量比足球稍重，有效減低足球彈跳嘅機會。場地仲有特製嘅木製巨型三角架，相當有心思。

隊際玩法多變

落場玩PoolSoccer時，玩家唔使帶Cue棍，除咗對鞋即可上場！玩法主要分兩個，當中「Number 8」會利用7個實色球、7個間條球及1個黑色球，玩家要各自打入所屬嘅顏色球，最後再入埋黑色球即為勝方。第二個玩法「Nineball」，枱上會有1至9號波排成菱形，玩家必須依數字由細至大順序打入，亦可像玩Pool美式桌球般，以白波撞擊其他波而令9號波入洞，即可成為贏家，既刺激又有難度。比賽除咗1對1之外，仲可改玩隊際2對2，可傳出白波再交由隊友接應，玩法更多變化，亦考隊友之間嘅默契。

放大圖片

可以玩隊際賽，由隊友傳出白波再補一腳，比直射易啲，但途中唔可以撞到其他顏色波。

「Nineball」的枱上只有9個波，順住號碼撞入就得。

腳底較易操控

PoolSoccer規則都幾寬鬆，除咗可以踢白波，仲能夠笠射、頭槌，技巧好的話仲可「Chok西」，基本上只要唔用手就得。傳統踢波會用腳內側或者腳面將波踢出，但對新手來說力量和角度較難控制，Samuel建議：「初玩不妨以腳底踢出，動作類似『搓波』，確保白波唔會彈起，而且更易控制。」小記同Model試玩時，發覺PoolSoccer嘅技術要求唔高，毋須控波、盤球之餘，體力消耗亦唔大，男女一齊玩都得；但要玩得叻就唔容易，皆因要控制球與球之間嘅撞擊角度及白波走向，幾有挑戰性。

就算畀對手Set Cue都唔驚，技術好嘅話可以笠射！

如果係玩「Number 8」的話，黑球一定要最尾才入。

PoolSoccer嘅波全部特別製造，並印上數字、顏色及花紋。

同場加映：桌上沙壺搶分

除咗主打嘅PoolSoccer，其實BALL ROOM仲有其他玩意，包括Board Games、美式桌球及賽事直播等，當中最具特色要數桌上沙壺，玩法類似冬奧比賽項目冰壺，只是改為桌上版，軌道則鋪上白沙。桌上備有不同得分區，玩家只要以餅狀金屬球滑向得分區便可，得分較高者為勝。由於軌道都幾跣，可以高速滑行，金屬球便會滑出界。玩家仲可落旋將軌道上的沙粒轉走，令對手難以接近得分區。