Toyota Prius C 專攻大長途

油費佔了駕駛族一大開支，如非必要都唔會揸咁遠。其實想慳荷包，揸電動車會較划算，但礙於充電不方便，因此集兩家之長的混能車迅速冒起。今次向豐田（Toyota）借來搭載油電混合動力系統的Prius C長測3天，每日開行冷氣穿梭大埔、沙田及深水埗，行走約200公里，借車時共6格油（滿油為10格），還車時只係用咗兩格而已，慳油到咁，放假揸遠啲遊車河都唔肉赤。

Toyota Prius C
售價：$234,500

力量合理行駛寧靜

Prius C的油電混合動力系統主要由1.5L 引擎及一具電動馬達組成，所搭載的1.5L VVT-i引擎，擁有73ps馬力及111Nm扭力。至於同步交流電動馬達（恒久磁石）就擁有61ps馬力及169Nm扭力。兩者共同發功可輸出總馬力101ps，配上電子控制無段變速波箱，轉波暢順，整體力量屬合理水平，在香港路面行走絕對綽綽有餘。最大分別是着車和行車時較寧靜。

減速轉化電力儲存

Prius C可以單靠電力來驅動馬達，鬆Brake輕吊油門便可應付起步需要，達致開車零油耗。當低速行駛，同樣只要輕吊油門，便會自動轉由馬達驅動，唔會嘥油。若有加速需要，例如在高速公路切線爬頭，踩深少許油門，馬達和引擎會共同啟動，傳送源源動力。更重要是車上電池毋須外界補充，每次減速，馬達便會把車輪的動能轉化成電力，儲存於電池。若電力不足，馬達亦會充當發電機，完全毋須擔心冇電的問題，喺咁慳油嘅情況下，難怪測試3天的油耗不高。

透過中控台頂的3.5吋屏幕，可監察混能系統的運作。

波棍台後方設節能（ECO）及純電驅動（EV）駕駛模式按鍵。

前座承托力及包裹力俱佳。

屏幕監察混能系統

描述了咁多油電混合動力系統的運作情況，大家可能未完全了解吧？老實講筆者都係靠中控台屏幕特設的即時駕駛監察系統顯示，先可以知得咁清楚。駕駛監察系統顯示是以圖畫和箭嘴為主，清晰易讀，具體交代混合動力系統的運作，讓駕駛者更清楚，並具體地了解幾時由馬達驅動電池供電，引擎幾時同電動馬達共同發功，以至幾時將車輪動能轉變為電力並儲存於電池內，值得一讚。

搭載油電混合動力系統，總馬力達到101ps。

若有更大的載物需要，只需將後排椅背放平騰出空間。

中控台的大面板音響系統，具備藍芽及USB連接。

車廂寬敞平實為主

車廂的實用和空間感都不俗，雖然車長只有3,995mm，但軸距長達2,550mm，尤其是後排，一般成年人都不會頂頭頂腳。至於尾箱置物空間亦屬合理水平，若有更大載物需要，把後排椅背放平即可。以平實為主的內裝，不賣弄花巧，予人簡潔的感覺，中控台配備大面板屏幕的音響系統，並有藍芽接駁及USB連接埠等，可連接智能手機或平板電腦，在駕駛時享受心愛的音樂。筆者最愛附設花粉過濾器的冷氣系統，保持車廂空氣清新。