CM1混血潮機 RAW心抓拍

手機溝相機喺Gadget界並非新鮮事，Samsung、LG甚至部分山寨廠都出過，不過最後總是贏了口碑，輸了銷量。Panasonic偏向虎山行，早前在日本推出混血機Lumix CM1，前手機、後相機造型本身已經夠晒爆，最誇張係內置Leica認證鏡頭，隨手就能拍出影友稱之為嘅「奶味」RAW相片，且看它能否如Leica相機般成為一代經典啦！

售價︰$10,800

操作相機般簡單

今年初CP+相機展的焦點有很多，但數最多人談論，卻是Lumix CM1混血機。齋看正面，它跟一般4.7吋手機沒有分別，但反轉一看，卻有齊鏡頭、轉環、快門鍵同仿皮外殼，活脫脫係相機模樣，淨係呢個Look已比一般Smartphone搶眼好多！實物拎上手，21mm厚、204g重恍如卡片型DC般輕薄，女仔放入Clutch Bag，或男仔攝入褲袋也輕鬆自如。操作亦易上手，拉一拉頂部「Camera」切換鍵，鏡頭即緩緩彈出，並可透過觸屏選擇iA等11種拍攝模式，加上扭一扭轉環便可變焦，用法跟DC無異，初哥都舞得掂！

支援RAW格式相片

Panasonic跟Leica關係一向密切，CM1雖非Made in Germany，卻用上了28mm Leica認證鏡頭，而且感光元件足有1吋之大，比一般手機最大只有1/1.5吋CMOS，無論雜訊控制、動態範圍表現都更佳，難怪拍出來的相片銳利細緻，「奶味」甚濃！除相質佳外，功能亦夠專業，例如支援23點對焦、ISO 12,800感光度，並可拍攝4K影片及4K Pre-Burst相片，而且連RAW格式相片都影到，方便慢慢Tune相，影友好難唔畀Like！

配備4.7吋屏幕，並預載公版Android 4.4系統。

機背用咗仿皮外殼及金屬邊框，甚有復古味道。

細細部女仔都揸得到，扭一扭轉環仲可以變焦或調校光圈快門。

全球限量2,000部

說到手機規格，新機搭載2.3GHz四核心處理器及2GB RAM，在《AnTuTu》輕鬆取得40,437高分。屏幕則有1,080p解像度，色彩自然亮麗，可還原鏡頭下最真實顏色。當然此機也並非全無缺點，例如內置記憶體只有16GB，若用來影RAW相片一定好快爆棚，建議帶多張microSD卡備用。另外，大感光元件注定食電，小記實測狂影相下，電池約4小時便玩完，想影得盡興似乎要「尿袋」跟身了！至於價錢，$10,800的確比iPhone 6 Plus仲要貴，不過單是機面「L」字樣便值回票值，加上全球限量2,000部，仲唔搶就賣晒o架啦！

連鏡頭厚21mm，以混血機來說算是合理。	設有Camera切換掣及實體快門鍵，操作同DC一樣。	可插4G SIM卡及microSD卡，後者最高支援128GB。
試相區人像：暗位表現極佳，主體抽離感較強，極具立體感，典型「奶味」相片。	風景：色彩偏冷調，邊緣清晰銳利，雜訊偏低。	28mm f/2.8鏡頭取得Leica認證，拍攝時會微微凸起。