小雲小寶寶最佳配搭

返工咁大壓力，收工當然要搵啲Figure慰藉吓自己。各位咪心邪小記講鹹濕嘢，其實只係買《IQ博士》公仔，緬懷童年回憶兼氹自己開心。早前Action Toys孖住推出EX合金小雲和小寶寶，出到第3代的小雲今次着住超人衫，伸晒脷Kawaii到極；而粉絲等到頸長嘅小寶寶，Cute爆啜機械維丹A奶樽，兩隻都咁可愛，點可以畀佢哋形單影隻，當然要帶晒返屋企，晚晚換場景，邊玩邊甜入心，咁咪乜嘢煩惱都一掃而空囉！

售價：$650/各

變超人穿越時空

喺《IQ博士》入面形象最百變嘅小雲，玩具自然有多個版本啦，其實EX合金之前推出過招牌工人服造型，以及盞鬼可愛嘅貓貓耳Look。而今次破壞力驚人嘅佢就扮「偶像」傻瓜超人，身穿布料縫製的淺藍緊身套裝，心口熨上大大個「紅圈A」字標誌，配條好似着咗尿片、下身脹卜卜嘅深藍色褲仔，再掛埋條醒目煲呔，披上內藏鐵線、可隨意折疊嘅紅色斗篷，簡直係向傻瓜超人致敬！配件方面，雖然冇咗小吉，但就有外形好似時鐘嘅「時光機」，採用金屬鑄模炮製，質感相當實在，連背面撥號轉輪嘅數字也清楚呈現出來，加上手腳可略作扭動，拍埋小雲一齊「奔跑」，重現故事穿梭時空一幕，搞笑趣怪。

夠鐘飲能量

呢頭小雲已經Cute成咁，但都掩蓋唔倒首次登場嘅小寶寶超高人氣。話晒在古仔入面視則卷千平為敵嘅馬斯特博士，偷偷抄襲了小雲Design而成，炮製出「牛奶糖4號」小寶寶來對付小雲，不過最終對小雲一見鍾情變成好朋友！故此有買EX合金小雲嘅粉絲，當然要入手埋小寶寶啦。造型方面，今次就預備咗官仔骨骨白裇衫藍色吊帶褲加紅卜卜領呔，配件就有佢最鍾意嘅奶樽形能量飲料機械維丹A一支，仲要係靠磁石結合手掌設計，唔使喺掌心開窿咁核突。此外又加埋小雲屋企個識講嘢嘅鬧鐘，正面仲Set埋朝早7:30「響鬧」功能，咁小寶寶當然要識得乖乖起身補充能量喇。