Enterbay All-Star MJ波神咆哮！

1996年經典復出奪標

「1996年舉辦嘅NBA All-Star Game，絕對係球迷最難忘嘅一屆，當時東岸有Michael Jordan、Shaq、Kemp同Penny，西岸則有爵士孖寶Malone、Stockton同Barkley等猛將，加上兩邊教練分別係Phil Jackson同George Karl，巨星如雲，真係有今生無來世o架！」H如是說。喬老大補充︰「嗰屆係佐敦復出後再參加全明星賽，但依然攞到MVP，證明33歲高齡兼退過休一樣可以打贏班後生仔，這正正係佢最偉大嘅地方。」

Figure約13吋高，並擁有30多個關節，入樽冇難度！	首次出咆哮表情，兩大名宿都話似，「始終伸脷樣太滑稽，呢個兇得嚟有神，仲好！」	湖水綠波衫像真度高，並同時改良了布料，穿上身貼服自然。

波衫球鞋像真度高

講番Figure，最搶眼當然係嗰件All-Star波衫。喬老大說︰「數咁多屆All-Star，呢件衫最靚，由於當年於聖安東尼奧舉行，而辣椒係當地特色食品，所以球衣就用咗辣椒做主題。Figure呢方面忠於原著，辣椒仔圖案、號碼字款同大細跟到足，而且連波衫隻湖水綠色都無偏差，像真度好高！」波衫以外，Figure另一亮眼點係一雙全白Air Jordan 11，「呢對鞋係MJ迷心目中神物，我自己有一對，呢對鞋仔算造得好Detail好細緻，鞋帶、鞋底花紋同漆皮面幾可亂真，當年買唔到嘅鞋迷依家總算如願。」

放大圖片	包裝盒重新設計，靚成咁叫人點捨得丟？	佐敦當年勇奪MVP，呢個獎座係Figure另一珍品。

限量3,000網上抽籤

頭雕向來係Figure靈魂，呢方面又點睇先？H指一指自己個口說︰「Enterbay之前都出過兩個表情嘅佐敦，但感覺較木口木面，今次呢個咆哮擘大口表情就似足我咁生動，而且沒有原先諗咁卡通，記憶中佐敦剷籃時個樣應該就係咁！」配件方面，送打底褲、護肘護膝及磁石波唔出奇，最驚喜係送埋All-Star MVP獎座同明星賽別注地台，就算舊玩家再買都有新鮮感。特別一提，呢隻Figure全球限量3,000套，香港分得1,000套，而且仲要上網抽籤先買到，加上備有編號證書，分分鐘仲難抽過居屋呀陰公！

有別於以往的公牛標誌，圓形地台改印上1996年聖安東尼奧明星賽Logo，別具收藏價值。	香港分得1,000隻，激罕！每盒仲有編號證書，當中以「23/3000」最值錢！	全白AJ 11，此對神物有錢都未必買到，依家買Figure就跟埋呢件配件畀你。

訂購詳情：非會員可於4月8日至12日參與網上抽籤，登記時間為每日10:00am~11:59pm。所有中籤者將於該輪登記時間後翌日中午前收到確認電郵通知。

查詢電話：2332 3615

另送打底褲、護肘同護膝，全部跟番當年佐敦所用的款式。	附送9隻造型手，當中兩隻內嵌磁石。	另送Pippen波衫

撰文︰陳志滔

攝影︰蔡浩文、張群生