RUGBY SEVENS殺埋身拆解達陣迷思

迷思1？

記者︰「七人欖球同其他欖球有咩唔同，係咪一味死衝就得？」

Andy︰「欖球一般分為『非撞式』同『碰撞式』兩類，前者唔可以有身體接觸，較適合初學者。而七人欖球屬於碰撞式，持球者要用身體或手把球壓在入球區，防守方則要盡力阻攔，達陣（Try）成功可得5分，再射入附加罰球（Conversion Kick）就額外得2分。相較於傳統15人賽上下半場各40分鐘，七人欖球上下半場只有7分鐘，銀盃決賽則延長至各10分鐘。睇落去好似打少啲時間，實際上更講求靈活、走位同爆炸力，一鋪牛力死衝無用，還要配合交波、攔截同鬥牛等基本功才可。」

迷思2？

記者︰「七欖球員為搶球無所不用其極，其實扯衫同批係咪合法O架？」

Andy︰「七人欖球容許身體接觸，基本上除膊頭以上位置唔掂得外，其餘皆可。扯衫球證一般都容許，經常有球員被扯甩衫都繼續比賽，但拳打腳踢等危險動作就一定唔得，犯規一方會被判罰球，嚴重的話仲會罰停賽。想正確攔截對方，其實好簡單，例如抱住對方腰部向下跌，對方就會即時倒下，並要立刻把球傳給隊友；相反若抱住上身，對方仲可以同你爭持兼跑動，撞唔跌對方仲白白浪費氣力！」

香港欖球總會全職教練 袁健濠	動作示範 迷思1 Scrum（鬥牛） 欖球只能向後傳，若違規向前傳會被吹罰，雙方球隊就要一字排開，以肩膀互相推撞以奪取發球權。	Pop Pass（短距離傳球） 近距離傳球，傳球者由下至上拋，接球者則緊抱入懷，多用雙手以提高傳球穩定性。

迷思3？

記者︰「點解欖球要設計成橄欖形，用足球或籃球代替嚟玩得唔得？」

Andy︰「欖球誕生於1823年嘅英國學校『Rugby School』，最初只用曬乾咗嘅豬膀胱製造，直至1851年皮靴商人William Gilbert改用4塊牛皮製，並展示在倫敦博覽會上，欖球雛形才告完成。有別於足球嘅圓形，欖球兩端呈尖狀，此設計既可提升握持感，又可增加滾動時嘅不確定性，令球路更難預測，而這亦是欖球吸引之處，其他球類難以代替。」

開球（Kick off） 由進攻球隊把球踢向敵方，球賽便開始，球必須超越敵方的10公尺線，否則對方有權要求重開或於中場進行鬥牛。	迷思2 錯誤攔截 根據球例，對方膊頭以上位置不能接觸，箍頸更係嚴重犯規動作可即時處罰。 正確攔截 攬住進攻球員膊頭以下位置，令其跌倒並立刻傳球。	迷思3 欖球以橡膠製造，品質堅韌耐用，由細至大分為2至5號，圖中是大會用的5號成人波。

迷思4？

記者︰「足球世界裏10號係王牌球員，欖球可否從號碼睇到球員嘅特性？」

Andy︰「七人欖球多用1至12號球衣，1至3號多是前鋒（Forward），4至7號大多是後衞（Backs），其餘則是後備球員。一般來說，前鋒身材較高大，着重以力量衝破敵陣，並負責鬥牛同協助後衞接界外球（Lineout）；而後衞則以速度、走位及組織制勝，所以多是跑得快兼身材矮小嘅球員。此外，欖球還有負責達陣嘅翼鋒（Wing）、負責勾球嘅勾球員（Hooker），同埋鬥牛時負責推向敵方嘅支柱（Prop）等位置。」

迷思4 前鋒在接界外球時要舉起後衞，少啲Power都唔得！

迷思5 女仔打欖球走位更靈活，絕對唔差過男仔玩！

迷思5？

記者︰「打欖球好似好危險，外國女子隊個個仲好似魯芬BB咁大隻，點解仲要玩？」

Chloe︰「其實欖球一啲都唔危險，只要經過連串正統訓練，打嗰陣就會學識點去保護身體，例如首要學跌，畀人撞低時先屈膝再Pat Pat落地就可卸去衝力，相反用手撐就好易整親。我自細開始打都好少受傷，頂多撞損臉，所以家人好放心！」

Ashley︰「我鍾意欖球因為佢係隊際運動，成班人互相合作個感覺好好。而且可以跑同攔截對手，比起其他無身體接觸嘅運動刺激好多。女仔打欖球優點係夠靈活，又較聽話落實到教練戰術，打落唔比男仔輸蝕！」

迷思6？

記者︰「睇七欖坐球場邊個位置最佳，又有咩需要注意？」

Andy︰「有飛在手又夠18歲嘅話，大鐘底南看台氣氛當然最佳，呢度係傳統最多Cosplay、玩得最放嘅位置。根據以往經驗，裸跑人士都會選擇在南看台『起跑』。若想睇清楚球員英姿，則可到北看台球員通道，好多球迷都會帶定長炮影相。另外，欖球又叫Gentlemen Game，講求尊重，睇波時既唔可以辱罵敵方球員，畀大電視影到你講電話仲會被全場噓爆，所以入得場都係專心睇波享樂啦！」

迷思7？

記者︰「今年賽事有咩焦點，邊啲球隊唔可以錯過？」

Andy︰「今年係賽事40周年，焦點仍然係斐濟、新西蘭、澳洲等幾支熱門球隊，而且賽果好關鍵，因為系列賽總排名頭四隊，將自動獲得明年里約熱內盧奧運會嘅入圍資格。系列賽尚餘4站，所以佢哋一定盡力搶分，強隊比賽一定好睇。女子賽則有阿根廷及墨西哥首度亮相。另外，港隊自去年夏天『亞洲女子七人欖球系列賽』奪得銀牌後，實力有所增強，值得期待！」

HK Sevens小資料

日期︰2015年3月27~29日

地點︰香港大球場

參賽球隊：28隊（包括16支種子隊及12支外圍賽球隊）

總獎金：15萬美元

查詢電話︰2504 8311

網址︰www.hksevens.com

全年有得學

想學欖球？香港欖球總會全年都會提供不同類型的欖球活動，例如基礎技術訓練計劃及青少年欖球訓練計劃等，踏入5月更有欖球推廣計劃供有興趣者報名，詳情可瀏覽欖總網頁www.hkrugby.com。

場外有得睇

雖然七欖賽事公開入場門票全部售罄，但無飛一樣可感受氣氛，事關今年大會將於大球場對面設立免費向公衆開放的「七人欖球地帶」，不但設有大屏幕直播賽事，還設有欖球、高爾夫球及網球等互動遊戲，而樂隊Red Hot Chili Peppers更會現場演奏炒熱氣氛！

部分攝影︰陳富權

撰文︰陳志滔