Xperia E4 Dual超強續航

依家買手機，機能固然重要，但電量亦不容忽視。Sony剛推出的Xperia E4 Dual，定位只係千元左右的入門機款，卻備有大芒、雙卡等實用功能，最重要係內置兩項省電模式，毋須再為電量擔驚受怕。

全方位平衡設計

Sony大部分手機都採用OmniBalance全方位平衡設計，Xperia E4亦唔例外，配合圓角機身及鋁合金圓形鍵，整體感覺年輕。美中不足是新機僅得黑、白兩色，若然用色Colorful啲一定更討好。此機支援雙卡雙待2G及3G制式，雖然只可同時有一張SIM卡用到3G網絡，但可隨時於系統切換主卡，啱晒成日外遊和出Trip嘅用家。

兩個省電模式

規格方面，新機備有5吋960×540解像度屏幕，細緻度只屬一般，好在IPS面板的可視角夠高，睇得清楚。雖然它只得2,300mAh電池容量，但內置STAMINA及Ultra STAMINA兩個省電模式，前者於屏幕關上時自動關閉Wi-Fi、流動數據等應用工具，僅開啟用家指定的應用程式如電郵、WhatsApp等，後者更只保留電話等基本功能，令續航力大增，電量唔夠嘅時候可以靠佢「續命」！