HTC雙卡新寵UltraPixel前鏡迷人

為咗自拍，很多人無所不用其極，出動自拍神棍、藍芽遙控甚至迷你腳架等，計小記話最重要係手機嘅前置鏡頭夠靚，咁就點影都咁迷人。HTC新作Desire 826 dual sim雖然只屬中階手機，但首次將廠方招牌嘅UltraPixel技術移植至前置鏡頭，喺低光環境下Selfie靚過人，更內置即時美顏模式、分鏡拍攝、貼紙相機等功能，係咪好嗒糖呢？

雜訊控制更佳

HTC嘅旗艦機如One M8等均用上UltraPixel鏡頭，不過僅限於機背嘅主鏡頭，今次Desire 826 dual sim將這招牌技術加進前置鏡頭，雖然最大只影到1,520×2,688解像度相片，約為400萬像素，但啱晒上傳至facebook、Instagram等社交網絡。最重要係UltraPixel感光元件比一般鏡頭大，吸光量、雜訊控制變得更好，配合F2.0大光圈，低光環境下玩自拍冇難度。Model喺室內自拍時發覺相片雜訊極少，仲提供即時美顏功能，就算有眼紋都可抹走，另內置分鏡拍攝及貼紙相機，前者可將畫面上下分割並分別用前後鏡拍攝，後者可拍攝出4×1、2×2等貼紙相效果嘅格仔圖，連後製Apps都可慳番。若嫌前置鏡頭像素唔夠高，新機亦搭載1,300萬像素主鏡頭，內置手動、HDR、全景、防手震及慢動作電影等模式，拍攝功能相當齊備。

HTC UltraPixel 售價：$3,398<br>備有5.5吋屏幕，解像度提升至1,080p，並內置Android 5.0作業系統。

HTC UltraPixel 售價：$3,398
備有5.5吋屏幕，解像度提升至1,080p，並內置Android 5.0作業系統。

喺室內環境利用UltraPixel前置鏡頭自拍，比平時更亮麗。

藍色機背經過磨沙處理，白色則改用拋光物料，手感差啲。

杜比靚聲效果

設計方面，新機出奇地唔似上代Desire 820 dual sim，整體風格更像同系嘅Desire Eye，機面備有特大前置鏡頭，並改用隱藏式BoomSound前置喇叭，不過改用5.5吋1,080p屏幕。另提供深藍加淺藍色，以及白加杏色機身，留意前者機背經磨沙處理，不易跣手，後者用上拋光機背，較為搶眼。惟有一點要扣分，新機重量達183g較墜手。幸好BoomSound前置喇叭支援Dolby Audio音效，無論經喇叭抑或插入耳機都用得到，睇片聽歌有更佳享受。

廠商亦有推出Dot View機套及透明機殼，售價待定。

雙卡槽均支援nanoSIM卡，卡槽仲有埋卡套，旁為microSD卡槽。

隱藏式BoomSound前置喇叭，配合Dolby Audio音色出眾。

中港兩地合用

新機採用Qualcomm Snapdragon 615 64-bit八核心處理器，配備2GB RAM及最新Android 5.0系統，操作、玩Apps相當流暢；而且廠商將介面微調，主題色調和排位都有所改動，好似多工頁面加入Google搜尋欄等。當然唔少得雙卡雙待功能，它兼容GSM、WCDMA、TD-SCDMA、FDD-LTE、TD-LTE多個中港網絡制式，經常北上嘅用家就最啱用。同時具備動態轉換功能（Dynamic Switch），可設定SIM1或SIM2接收4G網絡，毋須限制SIM卡擺位，使用更方便。順帶一提，現經指定經銷商購買此機，即可獲贈價值$488的HTC Care星級售後服務，包括15個月中港聯保、免費速遞維修及送修時免費手機借用等。