3大航拍熱點創意翱翔

空曠地方干擾少

香港有不少航拍發燒友聚腳嘅地方，Patrick指出當中較熱門有幾個。「數碼港海濱長廊、元朗南生圍和清水灣大坳門都比較多人玩航拍，事關這些地方環境空曠，附近冇乜高樓大廈包圍，對航拍機嘅干擾較少，普遍都可收到近15枚衞星訊號，增加航拍定位的穩定性。以數碼港為例，能夠拍到貝沙灣、鋼綫灣的大型船隻，若然天氣好，甚至可望到對岸的南丫島；不過玩時要注意唔好太接近民居和船隻，一來容易受到訊號干擾，二來會涉及私隱問題。」

追蹤模式玩自拍

可能大家睇開嘅航拍影片，十居其九係飛到半空鳥瞰攝錄，原來航拍機仲有好多其他玩法，Patrick介紹：「其實唔少航拍機都有自動追蹤功能，好似今次示範嘅Yuneec Q500內置Smart模式，開啟後航拍機會自動追蹤遙控器移動，當你向前行航拍機便會向前，向後行亦會跟住你向後，最適合用嚟自拍，例如跑步或踩單車時追拍自己。」此外，部分航拍機可將鏡頭拆落嚟，安裝在專用手柄上作地面攝錄，唔飛天時都可以喺地面拍攝補Shot。

部分航拍機可將鏡頭及雲台卸下，安裝在專用手柄上作地面攝錄。	電池大約可連續飛行20~25分鐘，Patrick一般會帶4枚以上作備用。	航拍機最好有三軸防震雲台，事關會直接影響到畫面穩定性。

最緊要注意安全

其實航拍玩法仲有很多發掘空間，如早前National Geographic將航拍機飛到活火山作近距離攝錄，然後製作出大型3D模型。不過Patrick話喺香港玩航拍有幾點要留意：「好多人都知道機場、直升機坪範圍都唔可以飛，但其實維港兩岸同屬禁飛區，就算可以飛嘅地方，飛行高度都唔可以離地面超過300呎，而航拍機的重量唔可以超過7kg。」他強調最緊要玩得安全，遇上行雷、落雨、大霧等惡劣天氣都不宜飛行；而且航拍機要保持喺視線範圍之內，千萬不可以喺別人頭頂飛過，以免發生意外。

今次示範的Q500，其遙控器內置屏幕，搭載Android兼可篤芒控制。	數碼港	清水灣大坳門

熱點1 數碼港

數碼港的拍攝題材豐富，不但能夠拍到貝沙灣，還可攝錄來往鋼綫灣的大型船隻，若然天色夠清，仲可影到對岸的南丫島，之不過航拍接收距離有限，唔好諗住可以飛埋過去。此外，海濱長廊有唔少人散步，飛行時切勿在別人頭頂飛過。

航拍達人Patrick建議操控航拍機時要保持在視線範圍之內。

使用自動追蹤功能時，完全唔使操作便會自動跟住遙控器移動，大玩航拍Selfie。

熱點2 清水灣大坳門

大坳門可望晒成個清水灣，一大片海域無遮無擋，令接收訊號特強，呢度亦係玩遙控飛機嘅熱點之一，因此航拍時要多加留意其他遙控玩家。若然要拍靚景不妨避過假日高峰期，仲可以飛去影埋清水灣二灘呢！

熱點3 元朗南生圍

南生圍的環境空曠，閒日人煙稀少，仲可拍到山貝河和元朗工業邨。雖然這裏有大草地作航拍，但附近有較多高大樹木，為免卡住樹枝或影響到生物棲息，無論起飛或降落都應避免靠近。飛行時亦要注意鳥群，減低與雀鳥碰撞的風險。

創意航拍玩法：穿越璀璨煙花

香港規定航拍機只可於白天飛行，估唔到有外國玩家不僅玩夜拍，仲藝高人膽大航拍West Palm Beach煙花匯演，在煙花中間穿梭，攝錄到震撼畫面，大家可以喺YouTube搜尋關鍵詞「Drone Fireworks」便睇到相關影片，之不過咁樣玩法喺香港就千祈唔好試呀！

航拍機運送鑽戒

航拍機除了可拍片，用嚟求婚一樣掂！早前藝人章子怡喺生日派對中，其男友汪峰以航拍機送上9.15卡鑽戒，無論概念和玩法都相當有創意，難怪女方見到既驚喜又感動，立即「I Do」啦！同時可經航拍鏡頭記錄女方感動一刻，好橋！

課程知多啲

如果大家未玩過航拍，又想體驗其樂趣的話，坊間有不少入門課程，如香港青年協會提供的航拍攝影技術培訓課程，會教授大家航拍的安全指引、操作和實習等內容，成功修畢者仲可獲得證書。

活動詳情

日期：2015年4月11日、14日、18日、21日

堂數：共4堂

對象：年滿18歲或以上人士（額滿即止）

費用：$7,600（包一部DJI Phantom FC40航拍機）

網址：http://clc.hkfyg.org.hk/page.aspx?corpname=clc&i=8662

查詢電話：3616 6071

撰文：黎子豪　攝影：林資凱

模特兒：Candy（Reborn Production）