5,060萬像素EOS 5Ds衝擊CP+「影」壇

新機試拍冰雕

CP+今年同樣在日本橫濱舉行，龍頭大廠Canon以往展出嘅單反相機多數係3,000萬像素以下，今次一口氣躍升至5,060萬像素，而且有齊EOS 5Ds及5Ds R型號供選擇。兩機最大分別係後者採用抵銷光學低通濾鏡作用的設計，令成像質素更高。幾經辛苦排咗成個鐘隊，小記終於有得試玩新機，拎上手嘅感覺有啲似EOS 5D Mark III，備有每秒5張連拍速度，試拍時寫入速度流暢冇Delay，整體反應靈敏。最正係試相區今年擺放咗冰雕供試拍，真係估佢唔到。

相片牆具臨場感

小記拎上手一路撳，發現EOS 5Ds及5Ds R於相片風格加入全新Fine Detail選項，對比度和飽和度較標準低，原來是為了重現高解像的畫質，不過就咁喺相機個芒又睇唔出有乜特別，可能要待6月推出時將佢駁落電腦「聞相」至夠明顯。擁有高像素當然唔會印細相咁浪費，所以試相區旁邊設有「臨場感作品藝廊」，展出了由新機所拍的大型相片，Size足足有成幅牆咁大，臨場感真係好似睇實物一樣。

EOS 5Ds（左）及5Ds R（右）外觀似到十足，分別在於後者型號有個紅色「R」字。	要試玩新機都唔易，事關現場反應熱烈，連條龍尾都見唔到。	「臨場感作品藝廊」展出了新機所拍的大型相片，不少人駐足「聞相」。

規格表

感光元件：5,060萬像素CMOS

轉換系數：1倍

屏幕：3.2吋104萬像素

快門：1/8,000~30秒

感光度：ISO 50~12,800

體積：152×116.4×76.4mm

重量：845g

新機配備5,060萬像素感光元件，備有每秒5張連拍速度。	EOS 750D（左）及760D（右）姊妹機，外觀上略有分別，最明顯是機頂模式轉盤位置。	EOS M3

其他新品一覽：EOS 750D及760D入門雙雄

除了高階機款外，同場還展出EOS 750D及760D入門單反，呢兩部姊妹機齋睇外觀已能分辨，定位較高嘅760D喺頂部設有液晶屏幕，模式轉盤的位置亦有所變動，加上機背提供操作轉盤，似足高階機嘅配置。至於EOS 750D偏向簡單易用，明顯針對新手而設計。兩機都有好多新功能，包括內置2,400萬像素感光元件、19點對焦點、Wi-Fi及NFC等。

用上180度翻芒設計，而且手柄位凸出，單手拎機都唔怕跣手。	EF 11~24mm F4L USM的體積都幾大，勝在成像質素一流。	現場花絮 相片儲存器Connect Station CS100特設專區供試玩，仲有工作人員示範和講解。

EOS M3 180度翻芒

這邊廂EOS M2無反相機剛喺香港開賣，那邊廂廠方已帶來新一代EOS M3，手柄位比前作凸出少少，不僅令手持拍攝更穩定，仿皮紋理的手感都幾好。最大賣點係加入180度翻芒設計，同Show Girl玩自拍都冇問題，加上頂部增設內置閃光燈，就算現場唔夠光都可幫手補光。值得一讚是其對焦速度幾快，掂一掂快門就可捕捉主體，Snapshot更輕鬆。

相機鏡頭「大晒冷」的擺法跟往年有點不同，以EOS ALL STARS 2015包裝。	長炮試玩區備有多支長炮，快門聲好似機關槍咁密，最過癮係遠處印有雀鳥剪影供試拍。	會場有Show Girls派發場刊，不同時段仲有攝影講座。

11~24mm 廣角鏡

其實除了相機之外，小記亦發現現場展出EF 11~24mm F4L USM廣角變焦鏡頭，唔計魚眼鏡頭，其11mm稱得上係最Wide嘅全片幅焦段，成像透視感強。由於用上F4恒定光圈，鏡頭Size都唔細，但配上全片幅相機嘅平衡感就相當好。

特派記者：黎子豪

鳴謝：Canon