風景王教路3式攝獵城門水塘

近日天氣暖番少少，最啱郊遊影靚相，唔想行到身水身汗就睇到靚景，位於荃灣城門谷一帶嘅城門水塘是不錯選擇，由荃灣乘82號小巴前往，車程只需30分鐘，入面有自然教育徑、「水浸白千層」、大城石澗等景點，今次搵嚟人稱「香港風景王」嘅攝影師Jeffrey Poon教路，讓各位輕鬆掌握影風景要訣。

腳架長曝「水浸白千層」

城門水塘的路段易行，就算女生都應付得到，途中仲有唔少獨特景色，例如全港獨有嘅「水浸白千層」，水塘某部分生長着白千層，樹木被湖水浸着極具意境，吸引不少人前來拍攝，若然是雨季，水位會更加高。Jeffrey表示：「影『水浸白千層』應該準備一支三腳架，並盡量用低角度影過去，以長時間曝光拍攝，便能影到平靜如鏡的湖面。」

減光濾鏡拍出絲絹石澗

叫得做水塘，水當然係最大賣點，相距「水浸白千層」約10分鐘路程，便會見到一座石橋，呢度係大城石澗的拍攝位置。Jeffrey指出：「溪流拍攝首要搵一個沒有青苔的大石作為站腳點，而且要用上腳架和俗稱減光濾鏡的ND Filter，建議使用4秒以上的慢快門拍攝，令流水變得好似絲絹咁滑。值得留意，千萬別將腳架插進水中，皆因流水沖擊時有機會造成畫面震動。」

廣角鏡配CPL 水壩拍藍天

若郊遊時遇上藍天白雲，千祈唔好錯過拍攝機會，之不過城門水塘沿路的樹木頗高大，想搵靚位的話大可到景觀開揚的地方，如菠蘿壩入口附近或者城門水塘主壩。Jeffrey解釋：「要影到蔚藍的天空，建議使用廣角鏡頭，並於鏡頭前方加上CPL偏光鏡，天空會變得比現實更藍。」他還建議大家以順光拍攝，即是早上向西方拍攝，而下午則向東方拍攝，避免逆光問題。