1:6 Allen Iverson最佳答案

素體落齊紋身

今時今日提起費城76人隊，腦中不禁想到「魚腩」二字，更令人懷念昔日艾佛遜快如閃電的抄截與跳投。現實難以再看到其英姿，但Enterbay的1:6 Figure卻可助球迷尋回絲絲片段，如「Jordan Shake」、「A.I. Crossover」等均可輕易做到，事關其素體備有30個關節之多，而且鬆緊度適中，只要配合9隻專用造型手，基本上擺任何招牌甫士都靈活自然。

留意素體更按照真人比例只有12吋高，比之前出過的NBA人偶矮一截，同時頸側「忠」字及全身紋身都落齊，就算爆衫都依然有型。

Hip Hop服飾只隨限量版附送，現已斷貨，網上更炒至雙倍價錢！	沿用圓形仿木地台，並印上費城76人Logo。	2001年艾佛遜勇奪MVP，自然送埋MVP獎盃。

附送兩款頭雕

艾佛遜是NBA第一個Hip Hop明星，辮子頭、Headband全部由佢帶起。這方面廠方提供兩個頭雕畀大家，分別是正常Look及剷籃O嘴Look，全部由大師SCUDERIA操刀、YJ上色兼監修。

Headband、護肘、波襪一大堆，讓玩家隨意配搭。	附送9隻造型手，留意其中一隻為招牌指天手勢。	高清技術下兩個頭雕幾可亂真，稍嫌少了股殺氣。

實物所見，高清製作技術下連毛孔都顯得一清二楚，而且雙眼圓潤通透，辮子頭層次有序，稍稍不滿是頭雕神情唔夠兇狠，少了一份「打掉門牙連血吞」的殺氣，玩家似乎要自行加工了。Headband則提供紅、白兩條，富彈性之餘還印有NBA Logo，一絲不苟。

放大圖片	辮子頭製作難度甚高，每個打結位都造埋出嚟，頸側仲有個「忠」字。	素體印有真人所有紋身，畀多$380便可買多一個Body，方便着齊主客兩套波衫。

豐富波衫配件

Enterbay一向不吝嗇服飾及配件，今次更賣大包，送齊費城76人主客3號波衫及短褲，另附有「THE ANSWER」字樣護肘、手帶、黑色打底褲及波襪，當中波衫選用特製布料，既可呈現當年波衫的光面質感，防污程度亦大大提高。而他出過的多對Signature shoes，廠商當然唔會遺漏，當中Answer IV及Answer V兩對波鞋，由鞋帶到鞋底花紋都造埋出嚟，而且今次攞正「拉臣」，Reebok Logo如實印上，更具珍藏價值。

普通版送Answer IV（左）及Answer V（右）兩對波鞋，已斷貨的限量版多送一對Question波鞋（中）。

送齊費城76人主客兩件波衫，並改用特製光面布料，極為像真。

撰文︰陳志滔　

攝影︰胡振文

查詢電話︰2332 3615