貝安琪抗母命前途自主

藝人貝安琪（Ankie）作為「星二代」，坦言深受母親劉香萍影響，從小已跟着母親到片場工作，對演藝產生濃厚興趣。她從小於德國做童星，至2007年才正式返港做模特兒及演員，而她的廿四孝母親亦與她一同返港，更成為她的經理人，替她接工作，又與她一同出席各大小活動，可謂形影不離。

相信世間上每一個母親都一樣愛錫自己的子女，但三十多年來，劉香萍一直貼身照顧Ankie，難免令人覺得Ankie過分被母親操控，甚至缺乏自由。對此，Ankie笑言：「佢喺我仲讀緊書嗰陣就看得緊，不過返咗嚟做嘢之後，佢只係關心我、畀啲意見我，畀好大自由度我。」

Ankie坦言一直以來的工作均由她自己決定接或不接，就如前年她夥拍藝人佘詩曼及林峯演出電視劇《使徒行者》，即使當時母親不建議她接拍，她仍堅決接受挑戰，她說：「佢話好辛苦，叫我唔好做。因為平時喺德國拍戲節奏慢好多，佢怕我唔慣，我同佢話想試吓辛苦。」

Ankie希望打開內地市場。	Ankie與母親劉香萍亦師亦友，形影不離。	劉香萍（右）為貝安琪（中）度身訂造電影《許願樹》。

母助翻譯劇本

事實證明Ankie的選擇是正確的，此劇播出後她人氣急升，她亦希望每年拍一部無綫劇集。不過，於德國長大的Ankie完全不懂中文，需要母親替她翻譯，才能把劇本完全了解。她坦言非常感激母親的支持及幫助，她說：「劇本唔識睇唔係問題，媽咪會解畀我聽。而且喺香港拍戲仲有幾個好處，就係我廣東話叻咗好多，又識到新朋友。」她笑言由於自己廣東話不是太靈光，拍攝時工作人員說話太快，亦有令她一頭霧水的時候，幸得佘詩曼及林峯在旁講解，才能把拍攝順利完成。

貝安琪	放大圖片	Ankie在《使徒行者》與林峯有不少對手戲。

開戲擔正女角

而提到母親為她度身訂造電影《許願樹》，不但讓Ankie擔正女主角，更親自執導，誓打造愛女為「最佳女主角」，Ankie說：「我見佢拍得好辛苦，因為要兼顧好多嘢，事無大小都要自己處理，上至選角、場景，下至帶漏咗拍攝器材、收音問題佢都要理。我成日同佢講叫佢唔好咁大壓力，同埋我都會盡量陪佢一齊做，所以我透過呢部戲都學咗好多製作上嘅嘢。」為了減輕母親的壓力，充滿孝心的Ankie會替媽媽按摩、帶她一起吃美食等等，紓緩母親緊張的情緒。

目標大陸市場

問Ankie可會受母親影響，對幕後工作產生興趣？她坦言自己目標明確，現階段把全副心力投放於幕前，她說：「做演員係我由細到大嘅夢想，依家可以實踐到夢想，真係覺得好幸福。我除咗喺香港發展之外，都喺德國簽咗經理人公司，會兩邊兼顧，不過其實都想去中國發展，因為中國有好多大型製作，而且中國市場大，係一個好值得開發嘅地方。」

男友有共同嗜好

蜜運中的Ankie現正與一名居住於洛杉磯的外籍男士拍拖，對方更是一名電影幕後工作人員，與Ankie有共同嗜好。Ankie坦言因工作而認識對方：「我同佢識咗六年，好好朋友。雖然我哋成日都分隔兩地，但係佢成日都會同我通電話。」Ankie大讚對方浪漫，有時間會給她驚喜，送花給她。問到母親可有見過男友？她說：「有一齊食過飯，媽咪都一早識得佢。」問到可會視男友為結婚對象？她甜笑表示：「我唔心急，好享受拍拖。」

採訪：龔凱欣

攝影：張福宏

服裝：S. Nine by Susanna Soo

場地：嵐喬日本料理