搞鬼群拍Party 玩轉影樓

參考澳洲自助照相館

近年呢類俗稱自拍館嘅變種影樓冒起，單係今次試玩嘅Snap HK便有4間店舖，分布於尖沙咀、銅鑼灣、旺角和荃灣，每間店都有唔同主題房，以尖沙咀旗艦店為例，入面有Wedding、甜品、Pinkland等主題房間，各可容納十幾人開Party，並提供不同背景替換，輕易拍出唔同Feel。負責人Aggie表示：「當初有自拍館嘅概念，其實係參考澳洲嘅自助式照相館，任由客人喺間房影相，嚟到香港加入更多玩味元素。」

逾千服飾及道具

自助式拍攝嘅玩法非常簡單，玩家喺指定時間內可任意拍照，期間仲可挑選喜愛的服飾和道具，Aggie指出：「單係尖沙咀店就有過千種服飾及道具畀人任着任玩，有公仔衫、婚紗、和服、校服等，當中最受歡迎係得意又可愛嘅公仔衫，而且我哋每日會將啲衫拎去洗衣店清洗，確保衞生。」模特兒Melody和Janet喺短短一個鐘換咗3套衫咁多，異口同聲話最鍾意扮卡通人物，造型夠另類。

公仔衫是較受歡迎的服裝之一，　二人扮起動物都幾搞笑。

Snap HK所用的是Canon EOS 6D單反相機，以及24~105mm標準變焦鏡頭。

雙屏幕

提供多種服飾畀各位揀，包括動物、卡通服等。	房間設有電動幕簾，以便轉背景主題，毋須人手換嚟換去。	前方會有兩個屏幕，一個負責Live View取景，另一個則是Playback睇相。

即睇Playback

傳統影樓有攝影師幫你影相，而且逐張相同你計數，自拍館就唔同，攝影師係你自己，而收費以每小時計算。每間房Set了兩支影樓燈、一部相機和兩個屏幕，屏幕分別用作Live View取景和Playback即時睇相，各位只需透過Remote便可遙控相機拍照，影出嚟嘅效果拍得住專業影樓。Aggie笑言：「見過有客人喺一個鐘內影咗過千張相，事關佢哋嚟過好多次，熟晒『架部』和流程，連換衫嘅時間都唔放過。」

Snap HK負責人Aggie表示，自拍館的概念來自澳洲並加以改良。	每間房都提供多款配件，有紙牌、眼鏡等，變化多籮籮。	影後服務 自備USB手指

影後服務 自備USB手指

大家影得咁盡興，到拎相嘅時候其實只需準備一隻USB手指就搞掂，影完有專人替各位過相。而每張相大概6MB左右，假如大家真係影咗成千張相，就要準備一隻至少6GB嘅USB手指或外置硬碟啦！若果大頭蝦唔記得帶儲存裝置的話，亦有USB手指供即場購買。

「Snap HK」詳情

營業時間：

12:20pm~10:30pm（平日）

11:00am~10:30pm（假日）

費用：$214/2人（其後每位加$59）

人數：2~15人

查詢電話：2668 6658（建議提早3天預約）

網址：snap.hk

其他玩法

I. 泳裝派對

大家唔一定要着現場提供嘅服飾，仲可以自備泳衣等服裝上陣。

II. 反串卡通

別以為自拍是年輕人玩意，長輩一樣可搞鬼地反串卡通或遊戲角色。

III. 婚紗主題

唔使等到結婚先着婚紗，現場可與閨密一齊穿起婚紗拍攝，留下難忘回憶。

IV. 群拍扮嘢

每間房最多可容納15人，一大班人扮鬼扮馬群拍都冇問題。

撰文：黎子豪

攝影：謝孝祥

模特兒：Melody（Zmodel）、Janet（Gaiety）