180度翻芒N2 快門環隨意拍

啱啱過咗聖誕，嚟緊嘅大除夕晚，梗係約埋班Friend齊齊倒數，要見證呢個重要時刻，當然要用相機記錄低，專門玩自拍嘅Canon PowerShot N2係時候出動，事關佢新增180度上揭式屏幕，配合全方位快門環Selfie Shutter，任何手勢都可一按即拍。

售價：$2,680

上揭式屏幕設計

雖然上代PowerShot N的四方果外形破格，可惜不設180度翻芒，玩自拍冇咁就手，所以廠方於PowerShot N2加入2.8吋上揭式屏幕，用家終於可睇住自己個樣構圖，亦方便以低角度取景；另具備篤芒對焦及影相功能，使用靈活又具彈性。話明專為自拍而設計，故新機植入自拍模式，支援3級美肌功能，還有背景散焦功能，輕易模仿前清後朦的淺景深效果。

多方位修正震動

可能用家會覺得奇怪，搵勻全機都唔見有快門掣，事關新機影相係靠鏡頭外圍嘅環形Selfie Shutter，按快門環任何一個位置都可拍攝，無論係左手拎機抑或右手Snapshot，甚至倒轉部機嚟影都掂。至於鏡頭備有8倍變焦能力，想Zoom的話只需扭動操作環，可惜鏡頭只有28mm廣角，焦段唔算太Wide，但自拍都算夠用，加上內置Hybrid IS防震系統，能夠水平、垂直、旋轉多方位修正震動，單手自拍都唔怕手震。