YotaPhone 2雙芒出擊 e-Paper智慳電

提起俄羅斯，以往只會諗起盧布、羅宋湯、紅場等，不過今期一定要改口講YotaPhone!其實俄羅斯品牌Yota Devices早前曾推出過雙芒手機，近日廠方將新一代YotaPhone 2引進香港，一邊彩芒、一邊e-Paper Display（EPD）嘅破格設計固然創新，連普京喺公開場合都親手將佢送畀習近平，難怪會成為追捧對象。想一試呢部國家領導都用嘅手機？$5,999即可入手！

售價：$5,999

背芒多種玩法

第一眼見YotaPhone 2，黑色直板圓角機身配以5吋AMOLED屏幕，外形同一般Smartphone接近。但翻轉機背卻有驚喜，皆因背部加入一個4.7吋e-Paper Display，即係類似Kindle等電子書專用嘅黑白屏幕，並加入Multi-Touch功能，特別在於電子紙屏幕支援YotaCover及YotaPanel介面，前者能顯示Wallpaper以及撥號、短訊、電郵等功能；後者則顯示電子書、時鐘、天氣等內容，唔使開着正面屏幕便可睇到訊息或操作相關功能。此外，用家透過YotaMirror更可將正面屏幕嘅畫面以鏡像形式喺機背顯示；廠商仲預載咗《國際象棋》、《數獨》、《2048》等多款特製遊戲，感覺好似回到黑白年代。

YotaEnergy省電功能

小記現場試用時，發覺除咗YotaMirror鏡像操作會有啲遲緩外，使用其他背芒功能嘅反應都相當順暢。最大賣點是黑白背芒比AMOLED彩芒嘅耗電量低好多，據廠商數據，單用一般機背功能可玩到2天至2.5天；用佢嚟睇書的話續航力更長達5天。新機另備有YotaEnergy功能，將慳電能力再提升，如電量剩低15%時，只用e-Paper Display使用基本功能，續航力都有近8.5小時，以後終於可飛甩「尿袋」！

背芒不僅可顯示資訊，取景玩自拍都掂，Selfie更就手。

試相區
於室內光源充足下拍攝，白平衡及對焦準確，成像不俗。

硬件規格強勁

設計夠Gimmick，規格亦唔求其，新機採用Qualcomm Snapdragon 800 2.2GHz四核心處理器及2GB RAM，硬件同坊間高階Android手機嘅分別唔大；唯一要擔心係機身不設microSD卡槽，得32GB內存未必夠戲迷使用。值得一提，新機嘅SIM卡插槽同音量鍵用上二合一設計，既係卡槽又係音量鍵，相當創新；還支援800、1800、2600MHz嘅4G LTE頻譜，全面兼容香港制式。軟件方面，新機預載Android 4.4系統，介面布局、預載Apps都與公版相若，操作亦算流暢。

喇叭設於機底，音量輸出都唔錯。	機身採用大路圓角設計，並加入虛擬功能鍵。	一般情況下背芒會上鎖，將畫面底嘅鎖頭圖示向上拉即可解鎖。
Yota Devices行政總裁Vlad Martynov專程嚟到香港發布會，親身介紹新機各項功能，佢手上嗰部仲係別注版！