3式攝獵璀璨夜飾

室內戶外場地推介

想練習Bling Bling攝影大法，擁有全港最高室內聖誕樹嘅又一城可說是首選，整棵聖誕樹足足有21米高，配合燈飾發出閃閃光芒。至於戶外場地，尖沙咀1881 Heritage最閃亮的並非中間巨型蠟燭，而是排列整齊的聖誕樹群，前中後景全部有齊。

第1式：濾鏡營造星光

五光十色的燈飾就咁影已經好靚，今年想搞搞新意思的話，不妨在單反或無反相機的鏡頭前方加入星光濾鏡，便能將燈飾幻化成閃閃星光，而且有「十」字形的4星、「＊」字形的6星和「米」字形的8星濾鏡效果選擇。若各位唔嫌畫面太花，最Bling梗係8星效果啦。此外，不少DC機仔都內置星芒濾鏡特效，會自動將高光位變成「十」字星芒，效果一樣咁閃。

在鏡頭前加上星光濾鏡，能夠令高光位變成星光，仲有4星、6星和8星效果供選擇。	小記於主體後方準備了3支「飛燈」，前面再加1支燈補臉光，影出嚟閃爆全場！	Nissin i40能對應多個相機系統，又支援Slave Flash無線飛燈功能。售價：$1,980（a）

第2式：飛燈閃爆全場

始終喺夜晚影燈飾光線較弱，若然想再璀璨一啲，大可玩俗稱「飛燈」嘅離機閃燈技巧。玩法是於主體後方加設支援Slave Flash的閃燈，再喺主體前方加一支閃光燈補臉光，配合星光濾鏡便會影到超大星芒效果。當中副廠出品的Nissin i40是近期人氣之選，一來它支援無線飛燈功能，二來Size夠細夠便攜。但要留意一點，大部分商場未經許可都唔可以Set腳架和燈架，所以最好搵Friend幫手飛燈啦！

試相區 利用星光濾鏡再加上多支「飛燈」，配合身後的Bling Bling聖誕樹，效果超靚。	於黑色卡紙中間剪出想要的圖案，便能拍出獨特散景。	將黑卡緊貼在鏡頭前方，便能將散景變成星星、聖誕樹等圖案。

第3式：黑卡迷人散景

如覺得玩飛燈同濾鏡成本太高，簡單一點可利用黑卡變出散景閃亮效果。首先準備能夠覆蓋鏡頭的黑色卡紙，再喺每張卡紙中間剪出細細的星星、聖誕樹等圖案，拍攝時只要把卡紙放喺鏡頭前方，影出嚟嘅燈飾散景便會變成星星、聖誕樹等相應圖案，係咪好神奇呢？打算影人的話，建議使用長焦距大光圈鏡頭，Bling Bling散景先至會又大又明顯，假如手上冇咁勁嘅器材則可使用微距近拍。

於黑卡中間剪出聖誕樹形狀，配合大光圈鏡頭，散景頓時變成聖誕樹圖案。

試相區 就算唔用遠攝大光圈鏡頭，微距近拍一樣玩到圖案散景效果。

Bling Bling相機之選

Q-S1香檳金無反

擁有40款個性化配色組合的Pentax Q-S1無反相機，當中最閃亮要數香檳金色機身，配合銀色鏡頭，望落已閃閃發光，加上機身夠細部，女士單手影相都冇問題，還備有內置閃光燈、Hotshoe插座等配套，送禮或者自用皆宜。

TR50自拍神器

講到閃閃發亮，一定要提自拍神器Casio TR50，它不僅擁有香檳金色選擇，機面還有由多種塗層壓鑄的凹凸菱形花紋，從不同角度去睇都見到Bling Bling效果，最重要是內置多種美顏功能，影到各位女士容光煥發。

達人有Say

專業攝影師Raymond表示：「聖誕節影人像加燈飾，通常會加入閃光燈元素。不過要注意夜間的燈飾多數偏暖黃，故相機會設定為鎢絲燈白平衡作矯正，之但係鎢絲燈白平衡會令閃燈光線偏藍，建議為閃光燈加上黃色Gel紙，令人景色溫達致同步效果。」

數字人生：聖誕馴鹿：

1 傳說聖誕老人乘坐由馴鹿拉的雪橇，於聖誕前1天派禮物給小朋友。

8 8隻馴鹿的名字為Dasher、Dancer、Prancer、Vixen、Comet、Cupid、Dunder、Blixem。20世紀加入一隻紅鼻子的Rudolph領頭。

1823 1823年《A Visit from St. Nicholas》詩篇，描述了8隻飛天馴鹿故事。

撰文：黎子豪　

攝影：胡振文

模特兒：Jackie X（Unique Model）

查詢電話：（a）2880 5050（b）2926 2300