港超球員困獸鬥 射爆鐵籠
近年室內足球場愈開愈多，對於Book唔到街場又怕打風落雨嘅波友嚟講當然歡迎。如果想踢得特別啲，不如試吓喺荃灣工廈新開嘅Soccer Cages，佢係香港首間「鐵籠足球場」，困獸鬥玩法更過癮！小記今次搵來港超球隊太陽飛馬嘅沈國輝同沈國強兩兄弟試腳，喺場內o彭o彭聲咁怒射鐵網！
噴畫布置似足外國
如果大家好記性的話，應會記得多年前某運動品牌曾經喺香港商場設置咗一個臨時鐵籠足球場，畀唔同隊伍參加3 Vs 3足球比賽。Soccer Cages搞手Kowin表示：「其實我之前去過其他室內足球場踢波，發覺佢哋大多喺球場圍吓高板，冇乜特色，所以決定開設當年風靡一時的鐵籠足球場。」除了在場內搭起鐵籠外，周圍配套亦甚講究，仲請來Graffiti高手喺四周噴畫，如球王比利同佢嘅金句等，幾有外國街頭踢波嘅感覺。
3 Vs 3每場20分鐘
鐵籠足球比賽以3 Vs 3進行，不設守門員，可隨意換人，但要球員離場後才可讓替補球員入場，每場比賽20分鐘。室內場踢法同街場好唔同，上落速度快，要時刻走位配合，仲可利用球場鐵網進行撞牆，用盡所有鐵籠空間，例如可以地波撞牆交波之外，仲可用埋8呎高嘅鐵籠頂作高波反彈同射波，玩法更多；如果想撞牆交波更準繩，可用到地面上1呎左右嘅鐵板撞牆。場外仲有個兩層高嘅觀眾席，坐定定睇比賽都好爽快。
射小龍門得分雙倍
對於職業球員嚟講，應付20分鐘困獸鬥比賽當然冇問題，但對小記呢類「偽波友」，都係玩計分好過。若各位細心觀察，可發現龍門正上方還有一個小龍門，Kowin話呢個設計係參考外國嘅非正規鐵籠足球場，射入小龍門可當兩分計，令輸緊嘅一隊有機會追喎！唔好以為小龍門好易射，因為龍門又細又貼住鐵籠頂，要個波夠勁先入到，連「大佬」沈國輝都要射幾球先射得中。不過好多波友嚟玩，只係想咬緊牙關狂抽鐵籠，射到嘭嘭聲嗰種Feel啫。惟踢波時鐵籠有機會因摩擦而產生靜電，建議唔好成日拉住鐵籠，電親就無謂啦！
球員有Say：勾起回憶
唔講唔知，原來沈國輝、沈國強兩兄弟十幾歲時，正正參加過商場舉行的鐵籠足球比賽，今次嚟到踢波試腳，憶起不少往事。「大佬」覺得鐵籠足球場最特別係射中鐵籠時嘅聲效好震撼；而「細佬」就覺得場內仿真草嘅草地較腍，比起唔少室內場嘅「地氈地」好踢。佢哋仲話，鐵籠足球場可練到過人、交波、走位技巧，又可以撞網和射小龍門，玩法多變。
踢波以外有乜玩？
Soccer Cages在球場之外，其他配套都有唔少，好似有PS4畀大家玩吓《FIFA 15》，仲安裝咗鏢靶可以掟吓飛鏢。另可玩埋唱K，啱晒陪同男友嚟踢波嘅女生。此外，場內有得玩現時幾受女仔歡迎嘅泡泡足球同新興射擊，每樣費用都係$3,000兩小時，啱晒一大班Friend嚟玩。
外國Cage Soccer單挑
其實外國都流行玩鐵籠足球賽，如以8塊或10塊鐵絲網加圍板，搭建出一個接近圓形嘅戶外迷你球場，參加人數少至1 Vs 1都有。呢種Cage Soccer方便在可隨時將鐵絲網運到任何地方搭建，所佔空間較小；不過球場空間細，需要較高技術和少少運氣。
網址：www.soccer-cage.com
沈國輝（大佬）
球隊：太陽飛馬
球衣：2號
位置：後衞
沈國強（細佬）
球隊：太陽飛馬
球衣：18號
位置：中場、前鋒
Soccer Cages資料
地址：荃灣馬角街8~12號新豐工業大廈1樓
營業時間：10:00am~1:00am
收費：$600/小時（星期一至五6:00pm前）、$700/小時（其他時間）
查詢電話：6339 9266
網址：www.soccercageshk.com
撰文：布偉倫
攝影：胡振文