EX 合金 Getter 1 終極戰損
呢頭Bandai推出SR合金Getter 1，嗰頭預告明年有Black Getter，弊在三一萬能俠1號個樣咁多年都冇乜點變，睇得多都有啲厭。話晒《三一萬能俠》誕生逾40年，機體設定要加入Gimmick先有新鮮感，好似EX合金系列最近加推「Getter 1最終決戰Ver.」，炮製出多個戰損造型，除咗爛面斷角、扯出核心，仲誇張到被火箭貫穿，將卡通中與恐龍帝國終極決戰的英姿重現眼前！
火箭貫穿身體
其實EX合金之前已出過Getter 1，由鬼才造型師佐藤拓設計、藤原辰弘炮製，凸顯機體魁梧肌肉感。不過英雄總有落難時，廠方特別整咗一套最終決戰Parts Set，透過換件重現終極一戰，被恐龍帝國火箭貫穿身體一幕。玩家只要於Getter 1加裝插背及更換穿肚組件，拆走火箭中央部分並將其一分為二，然後前後裝嵌在主體，便可逼真重現穿肚場面。此外，玩具附上右手捏碎火箭換件，可直接裝嵌於右腕上，而且各款組件的雕工精細，可見手掌拗斷火箭時，彈頭扭曲的模樣栩栩如生。
扯出核心逼真
不僅火箭穿肚靚得誇張，新作亦奉上Getter 1另一招牌甫士，從腹部扯出三一熔爐核心。玩具跟齊扯爛腹部喉管，以及右手緊握核心換件，玩家可透過連接喉管來重現「自爆」的震撼場面。所謂「做戲做全套」，今次玩具另一體貼之處，是附有大量戰損換件，包括上胸甲破裂組件、左手掌完全損毀，以及斷角加爛面頭部，一併更換後即可將Getter 1變得傷痕纍纍，營造出故事中跟恐龍帝國連場惡鬥之戰績。
附上Getmachine Eagle
同舊版Getter 1一樣，今次最終決戰版的機體相當足料，全身八成以上採用亞鉛合金炮製，小記拎上手把玩得耐，隻手都有啲攰。此外，玩具跟埋同比例三一戰機Getmachine Eagle，它同樣以合金製作，做工用料絕無欺場。新舊作在塗裝唯一有異的地方，是手臂齒輪由黑灰色改成銀灰色，間接令機體更亮眼。可惜肩膀前傾跟小腿後屈幅度沒有作出改良，想擺出大幅度動作甫士，難免要遷就角度。
撰文：廖俊斌
攝影：胡振文
查詢電話：2390 9843