1:4 Michael Jordan 波神大晒

放大版帶來新鮮感

毫無疑問，Enterbay的NBA Collection是現今最受歡迎的Figure系列之一，當中波神更是逢出必搶，然而在「I'm Back」主場45號、作客23號、黑色8周年紀念版、主場23號及「The Last Shot」等多個版本相繼推出後，再出1:6版本難免會背負「呃錢」罪名。有見及此，廠方遂把日漸成熟的1:4技術放入波神身上，不但將人偶高度拉長至20吋，更為玩家帶來新鮮感，氣勢磅礡的身形非舊版可比。小記特別將早前推出的13吋1:6 Dennis Rodman拍埋波神身邊，完全是大人同細路嘅分別，相當有趣。

頭雕像真塗裝出色

今趟波神以作客23號為藍本，雖然頭雕神情與1:6版本相若，但放大後可見五官、鬚根更加細緻，雙眼表面晶瑩剔透，受光後猶如真人眼睛般反光，像真度極高。同時臉上塗裝再非得一個色Tone，細心留意下會發現膚色有深有淺，令輪廓更立體突出。然而有讚亦有彈，套裝頭雕得一個，擺甫士難免有所限制，若送埋帶波時嘅伸脷表情會更吸引；同時正背面的接合位太過明顯，若塗裝時重手啲遮一遮，穿崩位便能好好修飾。

送齊11代至14代4對經典Air Jordan波鞋（由左至右），質感同花紋似足真鞋。

共提供10隻專用手，當中包括2隻磁石手以便揸住籃球。

附送經典AJ波鞋

關節方面則維持30個，鬆緊度適中，擺出傳、扭、射等動作都冇難度，而且膊頭關節比以往隱藏得更好。另一吸引之處是服裝，今次波衫改用新嘅軟身物料，整體更柔軟順服，兩邊膊頭位不會無故升起；另送齊11代至14代共4對經典Air Jordan波鞋，不但連鞋帶都造埋出嚟，11代的漆皮鞋頭、13代鞋踭的Jumpman半透明Logo更如真鞋一樣，誇張講句齋買鞋已值回票價！其他配件包括打底褲、Track Suit、MVP獎盃、總冠軍獎盃及磁石波等，加上公牛形嘅地台，質同量都冇投訴。

波衫布料改用軟身設計，着上身更柔軟貼服。	例牌附送Spalding磁石波，但係磁力沒有跟住放大，抓力冇以前咁勁。	附有MVP獎盃（左）及NBA總冠軍獎盃（右），雖是PVC製成，但塗裝甚有金屬感。

撰文︰陳志滔

Track Suit放大了，連帶整埋「啪鈕褲」，足見製作認真。	1:4 Jordan（左）高成20吋，拍埋13吋嘅1:6 Rodman（右）身邊恍如大人蝦細路。	今次唔送仿木地台，地台改為公牛形狀，別具新鮮感。

攝影︰蔡浩文

查詢電話︰2332 3615