《Call of Duty》由「Modern Warfare」進化到新一集「Advanced Warfare」，玩家都應該估到故事係講未來世界戰爭，換上高科技武器及裝備是理所當然，最特別是玩家可穿着提升速度、跳躍能力，甚至可隱身的外骨骼裝甲（Exoskeleton），就算敵人擁有強大火力都一樣冇有怕，一於喺下星期推出嘅時候，叫齊好友連線執行反恐任務！
新作背景設定喺2054年，到時係點應該冇人知，但遊戲開發公司好認真咁搵嚟美國國防部的情境模擬規劃師，聯同戰爭電影《拆彈雄心》、《追擊拉登行動》編劇Mark Boal，以及美軍特種部隊軍事顧問等喺背後支援，所以故事設定有根有據。今集講全球最大威脅已唔係國與國之間嘅衝突，而係恐怖主義抬頭，恐怖組織KVA同時對五大洲進行襲擊，炸毀各國核反應堆，就連美國都無力還擊，要借助全球最大僱傭兵集團ATLAS幫手平亂，對一向大美國主義嘅射擊遊戲有啲反諷意味。
話明係未來戰爭，當然有高科技裝備登場，當中最有Gimmick係外骨骼裝甲，它由ATLAS領導人Jonathan Irons收購全球最大生物工程公司所研發，遊戲公司好大手筆咁請來奧斯卡影帝Kevin Spacey飾演Jonathan Irons。到底外骨骼裝甲有幾勁？它可令角色跳得更高、跑得更快及做出高難度動作外，同時擁有隱形能力。而今集嘅戰場有美國三藩市、東歐巴爾幹山區、尼日利亞拉各斯、南韓首爾等，在之前不同遊戲展上，部分激戰片段已經曝光，好似在三藩市大橋上槍戰後改為步兵互片，氣氛緊張。
遊戲轉為未來背景，武裝同樣與時並進，譬如今集新增智能盾牌，當玩家在盾後用槍械瞄準後，盾牌便會自動開啟畀玩家射擊，仲識得自動轉向。此外，玩家可用到雷射步槍，發射高能量雷射攻擊地面敵人及空中載具。不過玩家要適應嘅係今集遊戲唔再用Head-up Display顯示戰場資訊，取而代之係以全息影像投射技術（Holographic Projection）顯示資料。多人對戰玩法則一如之前的《Call of Duty: Ghosts》，可揀選男或女性角色參戰，另追加多個喺前作出現過的多人戰模式，當中比較特別係Exo Survival模式，可以4人連線協力或以雙人分割畫面形式，迎接一波又一波由士兵或機械人組成的攻勢，愈打愈有挑戰性。
類型：射擊
開發：Sledgehammer Games
平台：PS4、Xbox One、PS3、Xbox 360、PC
推出日期：11月4日
售價：$429（普通版）$629（限定版）
查詢電話：2359 7998
撰文：布偉倫