Fixie踩場 煞車靠腳法
單車運動近年在香港冒起，不僅港隊有好成績，連普羅大眾都齊齊投入單車熱，除了Mountain Bike、Road Bike經常見到之外，連技巧較高嘅Fixed Gear（簡稱Fixie）都翻叮埋一份，皆因下月Red Bull喺香港搞咗個專為Fixie而設嘅「迷你鑊場」比賽。想玩埋一份？今次一於請嚟香港Fixed Gear之父Brian，為大家拆解有乜咁好玩！
變種場地單車
第一眼見到Fixed Gear單車，相信唔少人都會同小記一樣諗：「咪同架普通單車一樣！」其實Fixed Gear係將單車嘅齒輪（Gear）同後轆固定（Fixed），而且減去了煞車系統（Brake），原理同場地單車有點接近，不過前者可以喺街道踩，後者為鑊場比賽專用。Brian表示：「其實Fixed Gear起初喺美國紐約興起，50~60年代有一班單車速遞員，將唔用嘅殘舊場地單車改裝嚟代步，一來運送時唔怕塞車，二來呢款冇Brake嘅單車，就算畀人偷咗都唔識踩，可以話一舉兩得！」紐約興起之後，各地陸續出現一班粉絲，慢慢將此文化傳到日本等地。
摩擦地面減速
各位細心留意的話，會發現Fixed Gear車身冇咗繁複嘅煞車線之餘，亦只有一條單車鏈，配合簡約嘅車架、手把、車座及幼軚，齋靠樣已吸引到好多重視生活態度嘅優皮人士。不過想玩Fixed Gear，首要練得一身好「腳法」，Brian教路：「由於冇Brake嘅緣故，所以減速、停車都要靠雙腳，玩家一定要配備Lock鞋（單車專用鎖鞋）或腳套，食力啲先做到相關動作。最基本有Skipping同Skid，前者用雙腳快速並連續抽起腳踏同後轆，落地時再將轆輕輕摩擦地面；後者難度高啲，要離開座椅將身體重心壓前，並以膝蓋頂住手把。」
考驗個人技術
話就話有煞車技巧，不過Brian話都起碼要一、兩星期先練得好。而Fixed Gear減速嘅反應始終冇一般單車咁快，所以踩Fixed Gear一定要警覺性高，呢個正正係佢刺激嘅地方，Brian表示：「我哋成日話踩Fixed Gear要有第六感，因為你要預計兩秒後發生乜嘢事，而且仲要經常留意四方八面嘅行人和車輛，絕對唔可以分心。」話分兩頭，為咗安全起見，其實唔少地方包括香港都要求單車必須安裝煞車系統，所以香港Fixed Gear玩家都會幫「愛車」安裝前Brake，不過用唔用就要睇玩家嘅個人技術啦！
配件最緊要有型
Fixie除咗好玩之外，最緊要係外形夠殺，唔少玩家都會為愛車悉心打扮，當中以Vintage風格最受歡迎。
迷你鑊場 登陸香港
Red Bull Mini Drome喺美國等地已經舉辦多年，今年第一次登陸香港。呢個比賽最特別係於一個迷你鑊場舉行，鑊場長14米、闊7米、坡度為42度，參賽者要用Fixed Gear單車喺圈內同其他對手鬥快。比賽設有初賽及淘汰賽兩個階段，初賽限時3分鐘喺鑊場踩10個圈，時間最快嘅會進身淘汰賽；淘汰階段就改玩一對一追逐賽，兩名選手喺鑊場鬥快，畀對手從後追貼至1秒以內嘅距離或者翻車便會被淘汰，超刺激！Brian教路：「賽事大概4至5秒便會完成一個圈，所以好講求參賽者嘅爆發力同體力，而且因為場細彎急，參賽者需要好好控制架車。建議大家出賽前最好搵啲急彎位試吓，仲要留意埋平衡力。」
活動詳情
日期：2014年11月8日
時間：5:00pm~11:00pm
地點：觀塘海濱花園
費用：免費（必須為15歲或以上人士）
網址：www.redbull.hk/minidrome
Brian's Profile
2005年開始接觸Fixed Gear，並於外國網站訂購車架及零件，同時開始撰寫網誌hkfixed，成功將此文化引入香港。及後開始替其他玩家於美國、台灣等地訂購裝備，並於2008年開設全港首間Fixed Gear專門店Rodafixa。
撰文：林子聰 部分攝影：胡振文
模特兒：Elke（Zmodel）
查詢電話：2393 6863（產品）