旅人時光：擁有的欲望
公事繁忙又懶得專程預時間去戲院睇戲，所以經常錯失在大銀幕前欣賞好電影的機會。幸好好朋友是典型電影癡，幾乎所有首輪次輪中西日韓猛片，都可以從他的寶庫裏借到。只要知道某套電影的DVD已經面世，然後致電給這位電影庫主人，便可以進行借碟程序：約個日子吃過晚飯，朋友就會將我想觀賞的電影給我返屋企慢慢看。曾幾何時，去租帶租碟舖幫襯一樣。
當然做VIP還是要付出的，世上豈會有免費午餐？每當我出差到日本，朋友亦絕不會手下留情，情況猶如到淘寶落Order般，把我頓時變為一個不折不扣的速遞員。然而，做人有來有往，朋友間哪會斤斤計較？
在今時今日科技如此發達的年代，要安坐家中足不出戶，甚至乎是零使費去睇一套億萬製作的荷里活大電影或日韓劇，確實是易如反掌。以一千幾百買個「月光寶盒」，或Download個3D版亦是輕而易舉之事。從正途論，亦有人會選擇幫襯收費電視的自選影院，又新又快又方便。總之，我相信今日的消費者真的很難說服自己，要以真金白銀用幾舊水去買隻藍光碟回家慢慢欣賞。但電影癡朋友家中的珍藏，仍放滿了整間書房猶如影碟店般，一套電影可以有導演版、周年紀念版等多個版本，於是我曾好奇地問問他為何還是這樣堅持的花錢，他的答案來得既簡單又直接：「補償童年時未能擁有的失落！」典型中產Kidult的答案，讓我全無還擊之力。
網址：www.facebook.com/lamwaimei/