Ssmart dynamo 2+智能手帶戴出健康
想擁有健康身體，不少人會選擇做運動，但點先知道運動過量抑或不足呢？Oregon Scientific剛推出的Ssmart dynamo 2+智能手帶，能夠幫各位記錄運動量和分析活動，仲可以跟手機連結，每日郁動幾多一目了然。
手機App看數據
Ssmart dynamo 2+手帶可記錄行咗幾多路、卡路里消耗量等，輕拍兩下手帶表面便能切換訊息，更可透過藍芽與手機配對，利用《Ssmart Fit》App一次過睇晒所有活動數據。用家仲可將數據上載到facebook、twitter等社交網站，不過最得意係App內有得睇番自己嘅睡眠狀況，例如顯示睡眠時間、醒咗幾多次、甚至連深層睡眠都知道得一清二楚。
監測心率
智能手帶同時支援訊息及來電提示通知功能，當有朋友打電話來，或者WhatsApp有新訊息，手帶即可顯示文字提示用家。另具備追蹤功能，當手機離開手帶約10米範圍，手帶便會震動提醒用家帶電話，相反手帶唔知擺咗喺邊亦可透過手機尋找其位置，啱晒「大頭蝦」人士使用。最勁係佢支援ECG技術偵測心率，以手指輕按手帶表面的金屬片，即可顯示用家的心跳情況。
同場加映：Prysma投影時鐘
雖然不少人鍾意用手機睇時間，但睡房又點少得一個時鐘呢？同廠全新Prysma時鐘，具備資訊投影功能，鮮艷的光線將時間及溫度投影於空氣或牆壁上，並提供紅、藍、綠3色選擇。有趣的地方是3色機身的功能大有不同，綠色的Prysma G擁有數碼收音機功能，紅色的Prysma R備有雙重鬧鐘設計，至於藍色的Prysma B提供天氣預報。
撰文：黎子豪
攝影：莫文俊
查詢電話：2303 1889