六合彩唔中，iPhone又抽唔到，有時心諗︰「若果可以回到過去未來就好了！」不過以上只係幻想，除非閣下有部《回到未來》（Back to the Future）嘅時光車啦！殊不知Hot Toys竟然真的打造出來，唯一分別係這部DeLorean Time Machine，連同男主角Marty McFly一同被縮至1:6 Size。雖然小記改變不了歷史，但卻能回到年少時情迷Sci-Fi電影的美好時光！
要贏人，先要贏自己，對今時今日嘅Hot Toys而言，製作美女、怪獸、超級英雄Figures已易如反掌，惟製作大型Vehicle才能將功力進一步提升。繼叫好又叫座嘅Batmobile及Light Cycle後，廠方再次發功，把很多80後的共同回憶DeLorean Time Machine帶到大家眼前，而且不只是Showcase，是切切實實拍板收訂，為紀念明年《回到未來》上映30周年做好準備，預計2016年推出。
DeLorean Time Machine以1981年面世的DeLorean DMC-12為基礎開發，雖然廠方已跟足1:6比例縮細，但體積依舊有720×350×210mm，Size非常龐大，玩家要預備足夠空間擺放！廠方指出，由於當年電影未流行3D繪圖，在無參考之下，惟有由紙模重新做起，再轉為3D圖像，過程極其複雜，難怪單是研發便用了一年多時間。試辦所見，車內每個細節包括中控台的Time Circuit、車尾的風琴式引擎、多幅式輪圈及電線都製作得一絲不笱，連鷗翼門及頭尾LED燈都可如實啟動，像真到爆！美中不足是四個車轆不能向上翻起，同戲中飛行結構有啲分別。
時光車咁爆，男主角Marty McFly難免被搶鏡，但不代表Hot Toys馬虎了事，反而請了Jong Hyuk Park及JC. Hong兩位大師負責頭雕及監修，將演員Michael J. Fox的五官及稚氣一面忠實呈現。服裝則帶有80年代風格，戲中牛仔褲、格仔衫及橙色背心全部有齊，當中牛仔褸仲整埋布底花紋，佩服！配件數量亦相當豐富，例如8隻造型手、黑超、手錶、Walkman、攝錄機、背囊及滑板等，轉造型擺甫士有排玩。Figure將於明年派貨，希望廠商快啲整埋Emmett Brown博士，等玩家可將呢對孖寶齊齊放入Figure櫃啦！
售價：$4,580
預訂價：$4,500（2016年第一至第二季推出）
售價：$1,430
預訂價：$1,390（2015年第一至第二季推出）
撰文︰陳志滔
查詢電話：3722 3988
網址︰weibo.com/hottoyssecretbase