實測iPhone 6 買機前必讀

iPhone 6今天正式賣街，到底揀手感較好嘅4.7吋，抑或睇片效果更佳嘅5.5吋？相信是不少人考慮緊嘅問題，但正如Apple所講，新機「豈止於大」！其實佢由屏幕、拍攝到操控等細位都經過深思熟慮，唔似其他機王只識從硬件數字上爭一日長短，今次一於帶出街實測吓佢效能有幾強大！

iPhone 6售價：$5,588（16GB）、$6,388（64GB）、$7,188（128GB）、iPhone 6 Plus售價：$6,388（16GB）、$7,188（64GB）、$8,088（128GB）

硬件被拋離？

近期網上有一說法，話iPhone 6 Plus只是兩年前嘅手機硬件規格，從1,920×1,080解像度屏幕等去理解其實不無道理，但實際操作卻係另一回事。iPhone 6 Plus播放1,080p影片時能做到點對點顯示，而Retina HD顯示屏最強嘅地方不僅在於解像度，而係備有超高對比度同準確色彩，勝過不少充滿味精嘅大芒手機。此外，新機用上雙核A8處理器配M8動態協同處理器，牌面比唔上4+4核手機，但iPhone 6/6 Plus處理器跟iOS 8都以64-bit運行，對高圖像要求的多工作業，更能發揮當中優勢。小記以剛上架的《Spider-Man Unlimited》遊戲測試，無論Loading時間或畫面流暢度，iPhone 6 Plus都比各大Android機王優勝。另一方面，大芒手機通常都要雙手操控，新機最抵讚是加入降低畫面設計，只需輕觸兩下Home鍵即能將畫面降低，一隻拇指便能操控晒成個畫面。

手持夜拍更煞食

新iPhone在鏡頭設計作出相當多改動，如鏡頭採用凸出式設計，擔心佢會刮花的話，建議買番個靚靚機套。原來這凸出式鏡頭內有乾坤，iPhone 6 Plus的鏡頭內置光學影像防震功能，在低光環境下影相或拍片都幾有實際效用。小記以iPhone 6 Plus於黑夜街頭手持拍片，郁動時冇明顯晃動；另外在沒有開啟閃光燈的情況夜攝，成像比iPhone 5s更靚，惟礙於手機配備的影像感應器面積有限，雜訊處理始終唔及DSLR。幸好今次加入了大量拍片及攝影功能，如縮時攝影（Time Lapse）、預校拍攝（3秒或10秒），以及可拍240fps超慢動作鏡頭，唔使下載其他Apps都可以玩得到。