TGS直擊! VR現鯊蹤 大作有驚喜

杜小喬試 Project Morpheus 鯊魚搏鬥

Project Morpheus早於6月嘅E3遊戲展已亮相，原本著名製作人原田勝弘開發嘅VR遊戲《Summer Lesson》會喺TGS展出，不過到一星期前至話將這款在房間內跟美少女相處嘅遊戲抽起，原因係反應太好，驚畀唔到太多玩家試玩令大家失望喎！幸好除咗E3時試玩過嘅動作遊戲《Castle》、街道雪橇車《Street Luge》、太空射擊遊戲《Eve Valkyrie》之外，現場仲有新遊戲《The Deep》，可模擬潛落深海喺防鯊籠內跟大白鯊搏鬥，網絡紅人杜小喬試玩後同小記講，用頭戴式顯示器玩嘅時候，真係好似喺水入面同鯊魚玩緊，仲話超逼真、超興奮、超驚！

恐怖新Biohazard 兩女合作

現場有得試玩嘅驚慄大作《Biohazard Revelations 2》，今集以兩位女主角克蕾兒（Claire）同莫依菈（Moira）擔大旗，在孤島上探險。試玩版一開始要控制佢哋逃出建築物，玩法一如以往結合動作同解謎，好似想從懸在半空的警衞屍體拎鎖匙，點知主角突然跌落幾層樓下的地面，要靠切換角色從莫依菈手上的電筒周圍照先至搵到鎖匙。建築物內陰森恐怖，仲耐唔耐有喪屍出嚟嚇你，氣氛一流。

PlayStation非常重視《Bloodborne》，試玩區嘅大型恐怖獸人頭像都幾得人驚。

東京遊戲展一如以往喺幕張展覽館舉行。

Bloodborne打獸人 黑暗氣氛

今年PlayStation喺展區內力谷由FromSoftware開發嘅動作射擊遊戲《Bloodborne》。它以維多利亞時期為世界背景，玩家扮演一位獵人，去狩獵受瘟疫蔓延而產生嘅異變獸人，幾有同廠遊戲《Demon's Souls》嘅感覺。主角最勁嘅地方係右手可使用變形武器，而左手可動用槍械，試玩版難度不大，最有趣是引入「Regain」系統，受襲時只要在限定時間內反擊成功即能補血。遊戲最抵讚的地方是氣氛做得好好，可以感受到黑暗迷離感覺。

現場展出多部特別印花PS4。

PlayStation攤位吸引勁多人排隊試新Games。

NEWS 1 新作同步推繁體中文版

以往唔少日系遊戲都會推出繁體中文版，但往往係日版遊戲推出之後一、兩個月時間。SCEJA特別喺TGS開騷前一天（9月17日），喺東京品川總部召開針對亞洲市場的「SCEJA Conference Asia Session」，除了請來多位好有分量嘅遊戲製作人介紹新作外，仲即時宣布多款PS4大作同步推出繁體中文版，計有《Biohazard Revelations 2》、《Bloodborne》、《The Order: 1886》同首次推出繁體中文版的《人中之龍》新作《人中之龍 0 誓言的場所》等，對本地機迷來說當然是好消息。

遊戲不時有成條巨型大白鯊衝過來撞籠同咬籠，主觀鏡頭勁真實。	杜小喬試玩《The Deep》後，大讚超逼真、超興奮、超驚！	PlayStation展區內提供大量《Bloodborne》試玩台，但要排長龍先有得玩。繁中版推出日期：2015年2月20日

NEWS 2 金屬史萊姆PS4主機

發布會另一焦點係展出為明年《Dragon Quest Heroes》遊戲而製作的特別版「金屬史萊姆PS4主機」，除了銀色機身配合史萊姆圖案外，最特別是可於機身USB位加上金屬史萊姆裝飾。同場亦展示將於11月13日同步在香港推出的粉紅色版PS Vita主機，到時將會應用到PS Vita 3.30版新軟件更新，玩家可到PlayStation Store下載到不同新主題設計為PS Vita轉新Look！

《Biohazard Revelations 2》試玩版中，克蕾兒要從護衞屍首取得道具。繁中版推出日期：2015年初	兩款新遊戲硬件史萊姆PS4主機同粉紅色PS Vita都有在發布會上現身。	好多《Dragon Quest》粉絲都吼住這部金屬史萊姆PS4特別版主機。

特派記者：布偉倫

鳴謝：Sony Computer Entertainment Hong Kong