3米太空球暴走沙灘市集

太空球(Zorbing)在歐美等地相當流行,玩家匿喺一個巨型透明塑膠波,不受控地左轆右轆勁High!今個9月同10月仲轆到嚟香港,每逢星期六喺愉景灣剛揭幕嘅沙灘市集就有得玩,仲有專人喺外面「推波助瀾」周圍轆。同場另有海上跳彈床、滑水梯,玩到攰 又可到旁邊嘅攤檔Hea吓食吓嘢,仲可選購飾物、手作品等,絕對係周末好去處。

多種玩法 體驗失重感

從愉景灣碼頭落船,小記同Model等人行5分鐘左右,便到達大白灣沙灘,離遠已見兩個3米高嘅巨型太空球,大會話一個喺內部加水,令轉動時冇咁大摩擦力;另一個冇加水,想點轆悉隨尊便。採訪當日雖然唔係個個都有玩太空球,但差唔多全部遊客都同佢合照!

先講吓太空球嘅歷史,這源於90年代嘅新西蘭活動,3米高嘅太空球以透明膠料製造,內有約2米直徑空間,可供兩個人於球內綁上手腳,然後從一定斜度嘅草坡滾下,玩時滿有太空失重感覺;不過如果本身有高血壓、心臟病或是孕婦、長者,就唔適合玩啦。喺沙灘又啱唔啱玩太空球呢?嚟到香港衍生出變種玩法,最簡單係玩家匿入太空球內,背部貼住球體內壁並綁上手腳,由專人在外用力喺沙灘推波,既玩得安全又可體驗天旋地轉感覺。

人形倉鼠 平衡有難度

至於另一種玩法係玩家喺球內向前跑,產生動力令球體滾動,在廣闊嘅沙灘上疾走。雖然旁人睇落幾似滾輪上嘅倉鼠,但模特兒決定挑戰難度扮「人形倉鼠」!太空球兩側各有入口,要進入球內唔係太困難,但係裏面「軟腍腍」,最初模特兒要企起身保持平衡都有難度,好在試多幾次便可慢慢行令球體滾動,不過行時會仆吓跌吓,狼狽得嚟勁爆笑。其實唔少地方會將太空球放喺水上玩,玩時靠自己疾走令太空球喺水上滾動。如果大家都想體驗太空球的話,可到官網www.dbbeachmarket.org預訂,每個Time Slot約20分鐘,網上預訂優惠價為$200。

水上充氣彈床 免費任玩

太空球雖然新鮮刺激,但優惠價都要畀兩舊水,不如喺沙灘免費玩滑水梯同充氣彈床啦!前者雖然唔係咁斜,但由於滑梯加入泡泡增加跣水性,都吸引到唔少細路玩;後者設於近岸位置,拍攝時有大批外籍小朋友喺海上彈吓彈吓,玩到唔捨得走!玩到攰的話,沙灘市集另設有約20檔攤位,有賣美容產品、手工飾物、藝術品等,好有外國風情;大會還於沙灘設有多張餐枱,於草織太陽傘下吹着海風、飲杯啤酒、吃吓小食都唔錯。而10月4日及11日兩天,更備有德國啤酒節活動,於10月25日則設有萬聖節活動,到時會開放至晚上10時,記得捧場呀!

愉景灣沙灘市集詳情

日期:9月至10月每逢星期六

時間:早上11時至下午6時(特備節目期間延長至晚上10時)

地點:大嶼山愉景灣大白灣沙灘

入場費:免費

交通:從中環3號碼頭乘船可達愉景灣,船程約25分鐘,再步行5分鐘即達大白灣沙灘,單程船費為$40。

網址:https://www.facebook.com/beachmarketdiscoverybay

撰文:布偉倫

攝影:胡振文

模特兒:Melody Kan(Zmodel)