Honor X1配手帶 奇Phone突出

平板手機兩用

手機屏幕Size有限，額外拎多一部大芒平板又嫌麻煩，所以介乎兩者之間嘅Phablet（Phone+Tablet）應運而生，可惜市場嘅選擇一向唔多，而Honor X1正睇準呢個市場，搭載7吋全高清大芒，配合IPS素材，可視角度及細緻度都有保證。屏幕兩邊仲用上窄邊框，令屏幕佔機面面積達80%，手仔細細嘅Model都可單手拎機睇片。而且機身設有雙咪高峰及聽筒，直接擺埋耳邊便可煲電話粥，覺得突兀嘅話則換上Handsfree就搞掂！

反向充電功能

規格方面，新機植入自家Hisilicon Kirin 910 1.6GHz四核心處理器，配合2GB RAM來玩Apps都好流暢；就算玩埋懸浮視窗，以小視窗同時開啟日曆、計算機、短訊都未見窒機，表現合格有餘。此外，新機仲支援LTE Cat 4制式，理論下載速度達150Mbps。另一特別之處係內置5,000mAh大電池，而且支援反向充電功能，透過USB OTG線可連接其他Gadget幫佢充電，當做緊急「尿袋」都冇問題。最奇就係睇勻晒新機資料，咁勁嘅規格竟然賣$2,580，性價比出奇地高。

機背用上鋁合金物料，金屬感好強。

採用窄邊框設計，就算用上7吋巨屏都唔算太大舊。

TalkBand B1防水防塵

智能手帶近期勁Hit，廠商當然要玩埋一份。TalkBand B1採用橡膠手帶，機身支援IP57防水防塵標準，落雨都可照常使用，污糟嘅時候可隨時清洗。另備有1.4吋OLED屏幕，雖然唔支援篤芒，但卻內置感應器，可記錄步行步數、燃燒卡路里及睡眠質素等資料；用家仲可透過藍芽將數據同步至《Huawei TalkBand》應用程式，甚至設定每日目標運動量，將健康數據有系統地記錄，有助用家了解身體狀況。

microSD卡槽設於機側，不過卡槽要用針先開到。	手帶、耳機分體過程簡單快捷，用得靈活。	屏幕偏長，手腕幼嘅用家戴上手會有點鬆動。
一按機側的按鍵，即可轉換顯示計步、卡路里等數據。	手帶暗藏USB插頭，2小時即可充滿內置電池，可連續使用6天。

分拆變身耳機

手帶屏幕亦可顯示時間，來電時會Show到來電者名稱、電話號碼，中、英文都顯示到！美中不足係《WhatsApp》等程式暫時唔支援通知提示，希望日後更新可以追加番啦！此外，用家只要輕按手帶嘅按鍵，主機便能分拆出來，除了方便更換手帶外，佢本身仲係一隻藍芽耳機。原來手帶凹槽及機底均設有金屬接點，合體後便能記錄用家嘅健康資訊；當機身與手帶分體時，藍芽耳機功能便即啟動，可用嚟傾電話和聽歌。耳機還採用雙咪高峰設計，可減少背景雜音，傾電話自然更清晰。

撰文：林子聰

攝影：張錦昌、林子聰

模特兒：Nie（Zmodel）

查詢電話：3791 2856