另類3D光繪 Light Painting抱月

DIY特製電筒

中秋節唔少人會玩蠟燭，雖然點着嘅蠟燭可以發光，但唔係好嘅Light Painting工具，阿進、阿豪同珀琦強調：「一來蠟燭嘅亮度唔及電筒，二來佢嘅形態被限死，要畫出圖案較難，最重要係呢類發光體唔環保，冇得循環再用。」故他們建議大家使用電筒，甚至DIY製作發光工具畫「光波」。「我哋自製嘅電筒主要由充電池、12V的LED變色燈膽、遙控器、電線等組成，去鴨寮街就可買到，加埋兩舊水左右。」現場所見，特製電筒嘅外形有點似流星錘，以電線連繫頂部嘅燈膽，仲可透過遙控器轉換燈膽顏色，玩埋七彩效果。

手定兼搵中心點

Light Painting易學難精，最緊要係多加練習和嘗試，入門玩法以寫字和畫圖為主。「假如諗唔到想畫乜嘢，可試吓畫人物輪廓，畫面會豐富啲。」至於佢哋最耍家嘅光波Light Painting，梗係要趁住中秋畫個3D滿月啦，仲特別傳授拍攝心得。「各位可先定一個中心點，手要拎住特製電筒，好似揈流星錘咁不停垂直畫圓，跟住雙腳圍住中心點公轉，將所有圓形重疊於中間，咁就能將光線疊成3D光波。」至於光波大細因應所收放嘅電線長度而定，想畫到成個人咁大嘅「滿月」都冇問題。

光波的尺寸和顏色均沒有限制，揈電筒放長電線便可令光波更大。

拍攝器材除了腳架和相機，最好使用快門線按B快門，能提升穩定性。

人光合一靠閃燈

玩Light Painting又點可以少得相機呢？其實只要支援手動模式嘅無反或DC仔都可影到光繪，「拍攝時光圈可收細至F8~11，令前、中、後景的線條更實淨，而感光度毋須太高，大約ISO 100~400就夠用，最好有埋B快門，畫完便可即刻關上快門。」若然想人月兩團圓，將光波與人像結合，仲可以利用閃光燈，配合前簾或後簾快門為人物補光，當然曝光時主體要擺定甫士唔郁，減低鬼影出現嘅機會。

「香港鬧市光影塗鴉」facebook版主阿進、珀琦和阿豪（左至右），玩咗Light Painting兩年多時間。	特製電筒由充電池、12V的LED變色燈膽、遙控器、電線等組成，成本約$200。	人月兩團圓 先定下中心點，然後手部像流星錘般不停揈電筒，再圍繞中心點邊行邊揈。

《LightBomber》手機也塗鴉

雖然Light Painting有趣好玩，但唔係成日都有電筒同相機喺身邊，其實利用手機App一樣玩到，例如《LightBomber》透過疊相原理，可影到Light Painting效果，最過癮係佢可充當電筒，提供棒狀、大圓點、密集波點等選擇，仲有唔同顏色畀你揀，一App兩用。

試相區 想光波配合人物動作，相機可使用前簾或後簾快門拍攝，透過閃光燈鎖定人物。	光影輪廓 一般電筒便可畫出主體輪廓，記住要避免正面對着鏡頭進行光繪，以免造成眩光。	試相區 入門玩家不妨試吓喺主體外繪畫輪廓，配合不同燈光顏色，效果唔錯。

綵燈會教畫「花燈」

假如各位想同阿進、阿豪和珀琦齊齊玩Light Painting，依家有機會喇！事關佢哋將聯同康文署，於9月9日晚上的「新界東中秋綵燈會」活動，教大家畫「花燈」，而且費用全免，有興趣就記得帶埋相機和電筒一齊玩。

活動詳情

日期：9月9日（星期二）

時間：7:30pm~10:30pm

地點：大埔海濱公園

網址：www.lcsd.gov.hk

同場加映：創意光影塗鴉

螢光棒幻彩水流

中秋節唔少人會玩螢光棒，原來螢光棒亦可玩到另類Light Painting，外國攝影師Sean Lenz和Kris Abildgaard將五光十色的螢光棒拋進水流，讓它從上而下慢慢流動。而拍攝的曝光時間由30秒至7分鐘不等，便能拍攝出幻彩水流光繪。不過記住環境咁黑玩水要注意安全，玩完仲要執番晒啲螢光棒，以免破壞環境。

單車繪S形光軌

早前香港星野攝影達人Will Cho，諗到將單車結合Light Painting玩法，主要是將LED燈條貼於單車架的前叉位置，然後以慢速行駛，便能繪出多變的光軌圖案如S形、Z形等。不過單車Light Painting所需嘅技巧較高，各位記得事先諗定行車路線和花式。

撰文：黎子豪

攝影：蔡浩文

模特兒：Seacole（Reborn Production）