足足等了5年，PC模擬遊戲《The Sims》終於推出新一集。5年時間樓價翻了幾番，連《The Sims 4》的虛擬世界都有天翻地覆的改變，尤其係簡化起樓同布置房間嘅複雜設定，用上直覺操控方法，自己畫圖則同擺放家具，唔使再為買樓搬屋受氣。香港著名女機迷Kali，更遠赴澳洲EA試玩會實測新Game，大讚設計User Friendly！
歷代《The Sims》嘅玩法基本都一樣，由玩家創製模擬人物，放到虛擬世界生活，日常還會遇到其他角色（The Sims）發展出各種關係。每集遊戲都會在這主軸加入新設定及進行微調，更貼近大家嘅現實生活。大家或者會問，點解要花時間去「玩」多一個人生？答案就係可於遊戲做到現實做唔到嘅嘢，例如好多玩家鍾意喺遊戲整死角色，除咗可叫佢入房後拆掉房門待角色餓死，又或者亂搞電器引起火警燒死角色，今集仲加入開心到笑死等，非常搞鬼；不過新作初出時冇加入泳池設計，令好多粉絲投訴唔可以將佢浸死喎！
經過多年時間，《The Sims 4》遊戲畫面大躍進，亦將創造角色及設計家居程序變得簡化。上集創造角色時，玩家要在極多選擇下，將眼耳口鼻逐一拼貼，做到一個跟自己或特定人物似樣嘅角色，真係好花時間；而今集玩家只需用滑鼠從不同部位拉上拉下即能成形，甚至乎有藍色、綠色皮膚畀大家揀，整個阿凡達出嚟都掂。除咗外形，新作更可自行設計角色嘅性格、行為同情緒，在不同環境下會有特別反應。至於起屋方面，同樣可以用滑鼠輕易建設圖則及間隔，起好後只要有錢便可擴建房間。對於嫌麻煩嘅玩家，今集亦引進房間範本畀大家揀，可將成間房拉到第二層樓或其他位置，唔怕「上屋搬下屋，唔見一籮穀」。
玩咗《The Sims》系列多年嘅女機迷Kali，日前親身參與澳洲《The Sims 4》試玩會，她表示：「上集要創造出一個Asian角色相當困難，今集就容易得多，我仲一時興起整咗個《銀河守護隊》嘅綠色女主角Gamora，真係好似！起樓亦容易咗好多，我特別設計咗一間遊戲房，角色可於房內玩到Mini Games。遊戲製作人話，如果角色遇到Unexpected情況，可能會笑死或傷心死，我自己試玩時就拆咗間房門，等角色被BBQ爐燒死。遊戲設計雖然卡通化，但我喺10分滿分下會畀9分！」
類型：模擬
開發：EA Maxis The Sims Studio
平台：PC
售價：$429
撰文：布偉倫
網址：www.origin.com/zh-hk/store/