Bubble Football撞人為快樂之本

夏天忽雨忽晴，朝早個太陽曬住超翳焗，下午已行雷閃電傾盆大雨，玩戶外活動隨時掃興。想一大班Friend隨時喪出汗玩餐飽，咁就要試吓全城至Hit嘅Bubble Football泡泡足球喇！笠住個巨型充氣波波喺室內場踢足球，唔使驚撞人被紅牌趕出場，一埋牙即刻鬥身位展腳法，仲可以撞開對手幫隊友製造機會，彈飛落地又唔怕受傷，翻滾起身再玩過，刺激兼爆笑！

Bubble Suit分為1.5m（左）及1.7m（右）大小，迎合不同人士高度。

Zorbing融入足球

早陣子食正世盃熱潮，Bubble Football引入香港雖然只有幾個月時間，但已贏盡人氣。「Bubble Football HK」教練David解釋此新興玩意由來：「Bubble Football源自丹麥的遊戲項目，於2011年在挪威一個運動綜合節目《Golden Goal》亮相，有人將比賽過程放上YouTube後，從此風靡全球，由歐洲傳到台灣，今年再登陸香港。」呢種要玩家將上半身套入Bubble Suit踢波嘅活動，道具設計可算是由Zorbing變種而來，同樣以PVC或PPU塑料充氣成形，唯一分別在於Zorbing玩家要走進Zorb Ball裏奔跑，而中空嘅Bubble Suit好似套進救生圈般，利用內裏孭帶及把手來固定身體，露出雙腳走動。

未開踢前先學跌

外國Bubble Football多數會喺戶外草地作賽，人數能多達每邊10人，但香港地方有限，活動多數會移師至室內小型足球場進行，而且唔會加插球例，讓大家玩得更放。另外，玩家套住Bubble Suit走動時，需要更廣闊空間，於是遊戲亦改成4人隊制比賽，每場大約踢10~15分鐘，不設中場休息。由於遊戲Gimmick在於撞到對手一仆一碌，伺機搶波再射入龍門，所以盤扭腳法只係其次，亦毋須錫身驚撞傷，皆因Bubble Suit提供足夠保護，就算女仔都可隨時撞贏男仔。David提醒玩家，未開波前要先學會點樣跌倒再起番身。「比賽期間有機會被撞到飛起，有時玩家會驚惶失措唔知點起身，其實只要將身體轆番面向地一方，就自然可以屈膝重新站立，所以平衡力好嘅人士絕對有優勢！」

由於Bubble Suit充氣量大，開波前要用電泵打氣先有效率。

玩Bubble Football可以肆無忌憚同男仔鬥撞！

撞人衍生搞鬼玩法

若然齋鬥波，踢得耐都有啲悶，所以David鼓勵大家善用遊戲嘅衝撞特點，只要教練認為夠安全，玩家可隨時自訂搞鬼玩法。他表示：「我哋引入Bubble Football旨在帶畀大家歡樂，所以唔會硬性訂下規則。試過有玩家笠住套Bubble Suit，兩隊企喺球場邊線，哨子聲一響即撲到球場中線，於限時內鬥撞低對方為勝，十足打美式足球。」亦有簡單玩射罰球，要求守門員穿着Bubble Suit進行撲救，由於要「以波代手」，所以救球動作跌跌撞撞，相當惹笑。