Rolling Spider遙控爬牆遠走高飛

潮流興玩Phantom遙控直升機，高空拍攝的確盞鬼，可惜入門版都要幾千元，未必個個捨得畀。若想過手癮遙控飛行兼影吓相，Parrot新出嘅Rolling Spider就抵玩得多，它不但可俯衝、懸浮，就算爬上天花板都冇難度，玩得幾叻就考你技術啦！

嘩！飛天蜘蛛呀！

既堅硬又輕身

近年遙控數碼玩意漸趨普及化，Parrot新推出的Rolling Spider由主機身、一對大車轆及4個螺旋槳組成，前兩者分別由聚酰胺及碳纖維組成，既堅硬耐用，同時有效把整體重量減至55g，輕過部iPhone 5s一半有多，加上螺旋槳一碰硬物即會停止，意外撞到人都唔怕痛。顏色方面則備有紅、藍、白3色，並附有一張表情貼紙，讓玩家按心情貼於機頭。

手機藍芽控制

雖然佢個樣似玩具，但內裏技術卻專業得很，植入三軸加速計及三軸陀螺儀，能分析每個動作及傾斜度，又有自動駕駛儀修正飛行姿勢。最巴閉係機身設有鏡頭，可以影相之餘，仲能以每16ms把影像進行對比，以維持飛行穩定性。技術名詞咁多，實際點玩先？玩家只要開啟手機藍芽作配對，再透過《FreeFlight 3》專用App，即能控制它飛至最高4米，並做出轉彎、懸浮及快速反轉等高難度動作，着陸後更可透過車轆疾走，甚至如蜘蛛般沿牆爬至天花板，玩法新奇。

透過《FreeFlight 3》App，能限制其飛行高度及最大仰角。

《FreeFlight 3》操作介面簡單，透過虛擬鍵便能做出各種花式動作。

機底鏡頭（箭嘴示）除了可影相，還有助提高飛行穩定性。

易受氣流影響

小記初次「試飛」時，發覺它基本操控並唔難，但反轉、爬牆等動作就要學一輪先玩到，當中遇到的問題亦有不少，例如550mAh電池只夠玩8分鐘，剛玩到興起就要停下換電；機身過輕又易受氣流影響，飛近冷氣出風位好易墜機；而且手機App的完成度只屬一般，很多時指令會出現Delay。幸好，廠方表示8月上市時會解決以上問題，大家可以放心。