我覺得我阿媽佢愈嚟愈似大耳窿。
自從佢開咗facebook之後，日日就喺度監察我……都算喇，仲時不時又留Comment又Share我啲Post，感覺就好似喺我門口噴咗「欠債還錢」一樣……都算喇，仲去埋我公司啲facebook度搞事，直頭好似上我公司淋紅油一樣……都算喇，經我循循善誘勸導佢停止佢瘋狂嘅追星行為之後，佢都仲係屢勸不改。
我每一日都生活喺惶恐之中，我就嚟崩潰喇嗚吖。
可能你會話，阿媽都係關心你啫衰仔包，生舊叉燒好過生你呀！此言差矣，阿媽關心個仔嘅話，大可以打電話嚟關心，再唔係開個視像通話我都唔介意，邊有人拎住個大聲公周街大叫我好關心個仔o架？
可能你又會話，去你facebook留個言啫，使唔使咁誇張呀衰仔包！
此言超級差矣，係人都唔鍾意阿媽貼身追蹤o架啦。你試幻想吓你同啲朋友去玩嗰時，你阿媽跟喺側邊係咁講嘢，你會點吖？
你哋啲阿媽都冇解嘅，可唔可以明白吓兒女之心o架？我好少同朋友出街，對於我哋呢類宅男嚟講，個facebook Page就等於同朋友嘅聚會，我已經無可奈何咁畀你擔埋張櫈仔喺側邊偷聽我哋講嘢o架啦，點解你哋係都要加把口參與討論呢？
好啦，依家全世界人都覺得我不孝喇！
但我冇辦法，我走投無路。我冇嬲（其實有啲），我係無奈啫……啲阿媽真係難教過啲小朋友呀。
網址：www.facebook.com/linrixi