GALAXY Tab S 6.6mm輕薄雙絕

「輕薄」，漢語辭典中泛指「輕佻、不莊重」，輕薄佳人者，女士肯定避之則吉。然而這二字若用到Gadgets上，女士卻變得趨之若鶩，如Samsung剛發表的GALAXY Tab S平板，厚度、重量分別只有6.6mm及294g，拎上手恍如無物，配合8.4吋及10.5吋兩款型號選擇，2K畫面靚絕同儕，稱得上是新一代iPad殺手。

售價︰$3,098（8.4吋Wi-Fi）、$4,098（8.4吋LTE）、$3,898（10.5吋Wi-Fi）、$4,898（10.5吋LTE）

放大版Note 3

買任何Gadgets都好，厚度同重量均屬揀機條件之一。受測的Tab S 8.4，與其他尺寸相若的平板比較，拎上手明顯輕得多，原來它只有294g，機身仲薄到得6.6mm，比新iPad mini嘅331g及7.5mm更輕更薄。最重要是它薄得嚟唔鎅手，而且重心分布平均，就算長時間拎住煲劇都唔攰。外形方面，新機有點像放大版Note 3，機身圓鈍但有金屬邊框及底紋點綴，感覺高貴，小記認為新增的鈦金啡色比傳統珍珠白色來得特別，同女士們嘅皮手袋襯到絕！

植入2K靚芒

靚芒是其另一賣點，無論是8.4吋還是10.5吋型號，均採用Super AMOLED面板，解像度達WQXGA（2,560×1,600）的2K級數。小記現場所見，屏幕雖略帶味精感覺，但輸出顏色鮮艷奪目，拍埋同廠用LCD面板嘅Tab Pro比較，便會發覺Tab S畫面更光更飽和，高下立見。廠方指出，新機支援90% Adobe RGB色域及Adaptive Display技術，前者可還原大部分三原色，攝影師用嚟「聞相」啱晒；後者則會按現場環境調節色溫及亮度，夜晚用嚟睇波都唔怕太光睇壞眼。

Tab S正面看有點像放大版Note 3，預載最新Android 4.4系統。

有圖為證，真係薄過兩毫子嘅直徑一半有多！

即日開始預訂

規格方面，之前傳聞新機會用上Qualcomm S801處理器，但實機到手時卻採用自家Exynos 5八核心處理器，以1.3GHz及1.9GHz兩顆四核心處理器組成，雖然跑分不如S801款式，但實際操作仍感流暢，試玩《FIFA 14》這類大食App也沒有遲滯，並擁有低溫、低耗電等優勢，難怪廠方指它可連續播片11小時！另支援多重視窗、孩童模式等，而機面Home鍵更可充當指紋掃描器，為用戶提供多一層保障。此機由即日起至7月3日接受預訂，7月4日正式發售，預訂用家還可免費獲贈Book Cover保護套。