4K TV超高清對陣 八千有找

UA40HU5900J 大廠出品

機Gor最近行開AV Life影音舖同店長吹水，佢話世盃效應好勁，嚟換電視嘅人多咗成倍，最Hit首推Samsung UA40HU5900J，雖然畫面只有40吋，但解像度有成3,840×2,160，就算播放足球節目，球星嘅輪廓銳利感都明顯提升。最緊要係售價經濟，質素有大廠保證，之所以做得咁平，全因刪除了3D、語音、體感等花巧功能，想平玩大廠4K TV絕對諗得過。

小米電視2 水貨抵港

小米手機、小米盒子等賣到街知巷聞，這股旋風近日吹入4K TV界。小米電視2 L49M2-AA以49吋巨屏、3,999人仔定價震撼市場，惟現時只於內地官網有售，香港用家想擁有的話，便只能靠水貨，畀影音舖食差價是常識吧！機Gor向電氣良品嘅老友借咗部機嚟測試，插入USB手指播4K影片極之細膩，但駁天線接收數碼頻道時，就出現收唔齊台嘅情況。

遙控器實而不華，上方設有一個足球標誌掣，輕按一下能啟動足球模式。

只需付出$500，便買到廠方推出的UHD硬碟，內有5套4K影片如《地球末日戰》等。

第1回合：4K畫質鬥震撼：UA40HU5900J Win

想榨盡每滴4K畫質，梗係要用4K視頻作點對點顯示，機Gor透過廠方UHD硬碟，於UA40HU5900J播放4K電影《變種特攻：狼人外傳》，畫質明顯比一般藍光碟銳利，配合UHD光暗調校技術，暗位唔會黑埋一舊，AV Life影音專家Derek表示：「Samsung嘅電視一向畀人話味精過重，新機明顯改善了這問題，細位層次分明卻不失自然感。」而小米電視2接駁USB手指播4K片時，細緻度不比前者遜色，動態畫面亦夠流暢感，惟暗位層次感稍遜一籌。機Gor都係對自設Panel廠嘅Samsung有信心啲。

小米電視2 售價：約$7,500（b）	遙控器支援蜂鳴技術，可幫用家搵番遙控器擺喺邊。	附送Soundbar組合，內置6組全音單元及2組高音單元，加上無線超低音喇叭，音色不俗。

第2回合：網絡功能鬥方便：小米電視2 Win

近排晚晚通頂睇波，日頭都想轉吓口味上網，幸好兩機嘅網絡功能全面，UA40HU5900J可透過預載Apps玩到facebook和YouTube等，亦能利用虛擬鍵盤輸入網址，機Gor試入on.cc東網，中文顯示冇亂碼。小米電視2仲勁，整合咗小米盒子嘅網絡功能，機Gor試過上網睇片有唔少選擇，亦能透過自家商店下載精選Apps，甚至可自行經電腦安裝心水的apk應用程式。

Win UA40HU5900J試播4K《變種特攻：狼人外傳》時，連狼人面上的鬚根都睇得到，背景暗位亦見層次。	以小米電視2接駁USB手指播放4K風景片，向日葵花蕊雖然又細又密，但仍算清晰，滿有真實感。	以UA40HU5900J透過瀏覽器進入東網on.cc，中文顯示冇亂碼，睇片清晰流暢。

第3回合：優化增值鬥強勁：DRAW

為迎合球迷需要，UA40HU5900J引進足球模式，開啟後能提升包圍感，令人有置身球場感覺；另支援直播定格功能，遇上一些爭議場面能即時定格，並將畫面分為九格放大，就算球員出乜嘢小動作都唔會睇漏眼。小米電視2則支援動態背光及環境背光調整技術，能自動調校出最靚畫質，更可將智能手機內的畫面無線傳送至電視，靈活性強。

Win 小米電視2能透過自家商店，簡單下載心水Apps，亦能輸入關鍵字來搜尋程式。	DRAW UA40HU5900J開啟足球模式後，能提升環繞聲包圍感，睇波肯定更投入。	小米電視2能將手機畫面無線傳送至電視，將睇片臨場感大大提升。

UA40HU5900J 規格表

畫面尺寸：40吋

解像度：3,840×2,160

其他功能：100Hz流暢倍增技術、UHD光暗調校技術、四核處理器

體積：917.5×541.7×62.4mm

重量：8kg

小米電視2 規格表

畫面尺寸：49吋

解像度：3,840×2,160

其他功能：8組分區動態背光技術、Mstar 1.45GHz四核處理器

體積：1,092×637×15.5mm

重量：12.3kg

達人教路

影音專家Alan Lee：「4K TV入貨係時候！」「隨着不少內地品牌推出平價4K TV，日韓大廠明顯受壓，從Samsung推出八千有找的4K TV可見一斑。相信內地品牌在短時間仍難以取代大廠地位，以小米為例，它主要透過網絡渠道銷售，消費者難以親身試機，買水貨又要負擔運費和保養風險。至於日韓品牌為了進一步推廣4K TV，預計會推出更多尺寸選擇，加速4K普及化。」

機Gor Report：大廠4K TV信得過

4K是影音界一大趨勢，問題並非換唔換，而係幾時換同揀邊個牌子。以小米為首的內地品牌，優勢是超低價，49吋型號原價3,999人仔之餘，仲送埋Soundbar組合，吸引力不容小覷，之不過嚟到香港要賣成七千幾港元，倒不如揀差唔多價錢嘅Samsung UA40HU5900J，更有信心保證。

機Gor Profile

機不離身，不信Spec只信測試，不扮高深，懶理低俗，貪新不忘舊。

查詢電話：（a）2466 3398、（b）2359 7998

撰文：機Gor