Ascend P7 6.5mm激薄團拍王

Selfie（自拍）一字相信好多人都識，但大家有冇聽過Groufie（團拍）呢？國產大牌Huawei剛推出嘅Ascend P7，6.5mm薄切機身加上5吋全高清屏幕固然吸引，最正係加入800萬像素前置鏡頭，不僅用嚟Selfie搶眼，更支援自拍全景功能，用前置鏡頭都影到大合照，以後同姊妹自拍輕鬆得多。

800萬像素前置鏡頭加入自拍全景功能，還支援10級美白效果。

強化玻璃機身

Huawei近年力谷薄切手機如P1S、P6等，今次新出嘅Ascend P7，可說是P6的後繼機款，理所當然繼續Sell薄。其機身厚度僅6.5mm，雖然比6.18mm嘅前作略厚，但屏幕增大至5吋，與同Size手機比較，依然相當纖薄，加上僅重124g，講手感或便攜性都一流。新機繼承上代一體成形設計，不過用料更加揼本，機面及機背改用Corning Gorilla強化玻璃，背面仲印上Monogram花紋，配合金屬邊框，外觀極Grand！

全景玩Groufie

同姊妹相聚難免會用手機「團拍」，但就算伸長隻手都影唔晒所有人，新機嘅獨家拍攝功能就幫到手。一般手機都備有全景拍攝功能，惟只有後置鏡頭用得到，新機遂將此功能移植至800萬像素前置鏡頭，自拍大合照時只需將鏡頭左右移動，手機便會將相片合併，不僅駁位順滑出色，運算速度仲好快，以後唔使再伸長隻手或拎支自拍棍出嚟喇！廠商仲幫「團拍」改咗個名叫Groufie，意思係Group Selfie咁解添。另支援高速解鎖拍攝功能，用家喺熄芒時連按兩下「音量-」，便可啟動相機並按下快門，整個拍攝過程只需1秒左右，玩Snapshot快過人。

5吋全高清屏幕採用自家Emotion UI介面。售價：$3,680

機背加入強化玻璃，細望仲會睇到Monogram花紋。

支援4G上網

作為年度旗艦機，P7嘅規格自然唔失禮，5吋屏幕嘅解像度高達1,920×1,080，可視角、對比度及細緻度相當高，顯示效果唔會比日韓機王輸蝕。處理器方面用上自家研發的HiSilicon Kirin 910T四核心型號，時脈達1.8GHz，配合2GB RAM及16GB內存，睇片、玩Apps表現流暢。順帶一提，新機兼容LTE Cat 4網絡，支援800、900、1800、2100、2600MHz多個頻譜，下載速度最高可達150Mbps，串流影片超爽快！新機還預載自家Emotion UI介面，飛走AppDrawer功能表，而小記最Buy係佢嘅超級省電模式，啟動後屏幕會轉為單色，僅可進行通話、訊息等基本功能，藉此延長續航力。

可插入microSD卡擴充容量，惟要用針拮先開到卡槽。	機身只有6.5mm厚度，打贏iPhone 5s等對手。	屏幕兩邊邊框不足3mm，女士都可單手操控。
用家有Say 港姐冠軍陳凱琳