創意沙灘Games 槍淋彈雨
夏日炎炎，出街行兩步已汗流浹背，不如約齊三五知己去沙灘玩餐飽，除咗堆沙游水BBQ，想刺激啲嘅話，不妨帶齊今年新出嘅水槍，來個沙灘水戰Wargame。另有考各位眼力和腳法嘅便攜龍門套裝，以及透過手機操控活動嘅智能機械球，利用這些玩意再加點創意，普通Beach Games都可以玩得盡興。
水槍混戰濕身消暑
成班朋友去沙灘，除咗游水曬太陽外，水槍亦是指定玩意，一對一水中互射固然刺激，成班人組隊玩水戰Wargame更是鬥智鬥力。今年眾多新款水槍中，以三線十字弓水炮最有睇頭，其槍身左右設有活動機關，一按即可變成十字弓形態，讓左中右三個噴嘴，能以三路同時射水，範圍有成米咁闊，隨時能以一敵三，分組對戰時都咪話唔煞食。想公平啲嘅話，大可一人拎一支怪獸噴射水槍，只要輕推槍後的把手，水柱便會射出，由於槍身儲水量較少，每次射完都要補水，玩水中混戰就最啱玩。
沙灘另類玩波：龍門套裝啱Timing
巴西足球盛事轉眼就到，有南美般的炎熱天氣，又有沙灘美女陪襯，梗係要踢吓波應吓節。這款便攜足球龍門套裝，一打開就有個迷你龍門，龍門設有5個不同分數的洞，擺喺沙灘每人射5球鬥高分，考考各位嘅射門準繩度；想挑戰難度仲可加設後衞攔截，玩到大汗搭細汗再衝落水都咪話唔爽。
重炮射樽考眼界
新款水槍出水量多、射程遠，但通常玩兩玩就冇晒水，每次玩到興起就要入水都幾麻煩。唔想咁樣就要試吓新一代大容量三變水炮，佢嘅儲水量有成2.1公升，Model係咁狂射都仲有水出，而且輕扭噴嘴仲能變換射水模式，包括強化射程、擴散或威力。不妨喺沙灘指定範圍如樹上、沙坑等擺放不同水樽，沿路鬥快射跌晒目標，既考眼界又考腦筋，如果Plan錯射擊路線隨時用晒啲水，輸咗嗰位一於罰佢企定定畀人圍射啦！
智能機械球靈活操控
今時今日沙灘波都數碼化？講緊嘅係Sphero 2.0智能機械球，玩家只要於智能裝置下載《Sphero》App，便能透過藍芽遙控機械球，前後左右靈活移動，而應用程式內設有廿多種不同玩法，配合另購的專屬防水套，便能全面防水防震，就算在沙灘沾上海水都唔怕。
同場加映：防水喇叭 播歌添氣氛
TDK Micro A12的骰輕巧
TDK最新藍芽喇叭Micro A12，將體積縮減至82.5×82.5×29.2mm，重量更只有40g。雖然機仔細細，但支援藍芽2.1+EDR傳音技術，內置1.5吋單元及2吋無源低頻軸射器，配合防水防塵外殼設計，絕對是沙灘聽歌的好拍檔。
BOOM Swimmer易掛便攜
舊陣時去沙灘例必帶部卡式機傍身，依家就變作藍芽防水喇叭。以BOOM Swimmer為例，備有IPX7防水認證，同時內置電池，只需充電2小時便能連續播放16小時，仲有藍、紅、綠、黑及白色選擇。喇叭設有能屈曲的尾部，能簡單地掛於樹枝、沙灘椅等。
撰文：周仲明
攝影：方偉堅
模特兒：Kate（Zmodel）
查詢電話：（a）2287 1888、（b）3102 2783、（c）2262 1173