所屬健身中心的一間分店關閉了，另一間分店由大屋搬細屋，令我意興闌珊，連續多個月沒有前往，亦連續多個月沒有交月費……本來以為不拖不欠地結束關係，卻惹來專業追數公司 ── 即是大耳窿 追數。
與健身中心交涉一輪，我付了某個款額，事情總算解決，但大耳窿繼續來電：「陳生，你仲未畀4個月會費喎。」我說：「已交咗錢。」大耳窿說：「我未收到會計部指令，只可以繼續向你追。」我說：「你問吓會計部咪得囉。」大耳窿說：「呢個唔係我嘅責任，我只係負責追數。」又好似言之有理。
我將心比己：「我都唔想令你難做，你話我知我可以點先？」大耳窿說：「你Fax張收據過嚟囉。」我說：「我冇Fax機喎。」大耳窿不滿：「你點可能冇Fax機？」我答：「依家邊個仲用Fax？用E-mail咪得囉。」大耳窿更不滿：「你返公司Fax囉。」我答：「我唔使返工。」大耳窿極不滿：「你唔使返工？你點解唔使返工？」輪到我不滿：「我點解一定要返工？乜人人都一定要返工㗎咩？」
大耳窿無言，我提議：「我E-mail或者WhatsApp張收據畀你囉。」大耳窿說：「我冇E-mail，亦都冇WhatsApp。」我不滿：「吓？你做大耳窿竟然冇E-mail同WhatsApp？」輪到大耳窿不滿：「呢個係固網電話，點E-mail點WhatsApp呀？」
我和大耳窿的初回邂逅就是這樣，在互相嫌棄、互相構成不便之中一拍兩散。
網址：www.chan-wai.com