Faith主流MK Pop 愈笑愈紅？

Sky 14歲，家住土瓜灣，F.3學生

Hiu Yong 21歲，家住旺角，正職IVE室內設計學生

成名有法第1式：畫眼線

第2式：騎呢舞

Wave 17歲，家住天水圍，正職跳舞老師

記者：採訪現場笑聲不斷

近年香港人負能量爆燈，當「正能量」Faith突然殺出，雖則話歌藝舞技都係半桶水，但引到香港人一笑卻是功德無量。上星期六約三子於旺角舞室訪問，現場一樣笑聲不斷，反應正面，中間還夾雜着歡呼聲，由此可見他們身邊不乏支持者。音樂響起，三子立時收起笑容認真排舞，連帶經理人也一起舞動，雖然繼續甩Beat，但難免叫人肅然起敬，而跳舞亦將他們連繫起來。Hiu Yong說︰「我哋三個喺跳舞學校認識，當初只有我一個跟經理人Percy學唱歌，適逢佢覺得樂壇少跳唱組合，就揀咗我哋秘密練兵。上年10月成立，今年3月30日正式首演。」

Faith：大家多多包容

所謂首演，其實只是在星光大道租場表演，但由於當時「首本名曲」《Stop Peeping》已經熱爆網絡，所以現場Fans都有四、五十人，時至今日依然讓三子回味。「當初拍MV放上網只係諗住玩吓，無諗過回響咁大。坦白講個MV的確未夠成熟，拍嗰個又係新導演，剪接、鏡頭都麻麻地，所以希望大家多多包容。」識得賴，一定賴導演，但造型做咩要抄韓仔先？「成立初期我哋做咗好多Research，發覺香港依家興韓風，所以造型上有參考過K Pop，畫眼線兼化韓妝，希望測試吓香港人接唔接受到。」

Hiu Yong：靚唔靚仔見仁見智

結果證實，《Stop Peeping》有超過90萬點擊率，第二首派台歌《Ma Ma Easy》亦有80多萬，數字上比好多二三線要買Like的歌手還要高，似乎香港人真係Buy喎！然而當中卻夾雜着不少鍵盤殺手，一邊食花生一邊粗言穢語大肆批評，「收皮」、「Dislike」之聲此起彼落，當中鬧得最多的是他們不夠靚仔，兼且骨瘦如柴十足饑荒兒童，三子又點睇？「靚唔靚仔就見仁見智，各花入各眼啦！但我哋認自己係比較瘦削，不過Sky得14歲，依家做Gym會影響發育。相反我同Wave就踏入Train Up期，所以暑假時都會操吓。」Hiu Yong一派自信地表示。

Hiu Yong：自信唱歌唔差

做得跳唱組合，唱歌跳舞唔甩Beat是常識吧！惟他們偏偏樣樣做齊，Hiu Yong平反︰「我自己學咗四、五年唱歌，學校歌唱比賽亦贏過獎項，所以自信唱歌唔會差。但我跳舞就冇佢兩個咁好，惟有大家互補長短啦！」識得互補當然好，但面對批評又如何自處呢？三子承認初期的確壓力很大，更嚎啕大哭過，但後來得到家人支持而想通，「樂壇需要時間接受新事物，好似70年代許冠傑嘅貓王風格，80年代張國榮、梅艷芳大唱日本改編歌，初期都好多人鬧，但最後證實成功。我哋唔介意MK Pop呢個名，起碼引咗人注意先，日後再加入自己音樂元素落去！」

Sky：現場睇先正

樂觀面對，大人都未必做到，可能正如「波神」Michael Jordan話齋︰「我能接受失敗，但不能接受沒有嘗試」，難得他們年紀輕輕卻認真去試。然而MK Pop大熱，「驚」喜新人輩出，如何面對挑戰？「同天堂鳥合作過，真人好大隻，跳舞好有力。拾音社就以唱作為主，好欣賞佢哋嘅曲風！但我哋勝在青春，有更多時間成長，相反佢哋就較成熟了！」連消帶打，果然注定食娛樂圈呢行飯，不過香港興速食文化，只怕未成長已淹沒人海，所以他們珍惜每一個表演機會，電視台、校園Show無一放過，說話不多的Sky最後不忘補充︰「唔好剩係批評！現場睇先正嘛！」青澀得可愛，難怪女網友至Like佢！

成名有法

Faith能迅速成名，歸根究柢全憑以下3式，後來者不妨參考。

第1式：畫眼線

畫眼線化韓妝，加大雙眼烱烱有神，在外貌先聲奪人。

第2式：騎呢舞

舞蹈甩Beat，動作唔齊，代表組合還有成長空間。

第3式：放上網

把MV放上網，盡快讓網民瀏覽及認識，從而製造話題。

何謂MK Pop？

所謂MK Pop，意指舞姿騎呢、打扮浮誇、曲風抄襲日韓，而充滿旺角（MK）年輕人的跳唱組合。他們的歌藝未必獲得大眾認同，但卻為網友帶來無限笑聲及創作空間，有刺激香港樂壇的正面作用。有指前E-Kids成員阮民安（Tommy仔）是MK Pop的始祖。

K Pop大熱有因

Faith用半年時間訓練兼出道，在香港這個急進市場可能已經算長，但對比K Pop，人家的訓練就艱苦長遠得多。有香港韓流第一人之稱的劉偉恒表示︰「韓國造星文化有計劃有系統，每年全國各地都會舉辦招募大會，每次招募百多人。他們小至12歲就在明星學園開始『國訓』，期間不但要學唱歌跳舞，還要做『阿四』，幫師兄師姐抹汗遞毛巾。這種事香港家長一定唔准，但韓國社會尊卑有序所以大家不以為然。一般韓國Artist要訓練6至7年才出道，若實力不夠或苦無機會就會被淘汰，最後留下來的都是精英中的精英，所以K Pop能席捲全球絕對有原因。」

文化人點評

MK Pop引起熱話，凡夫俗子如小記一邊看一邊笑，但文化人又怎看呢？一於找評論人健吾以及樂評人田中小百合，分別表述。

健吾

「我對MK Pop沒有感覺，不好看的東西不用太大感覺吧！MK Pop的興起，是因為香港人愛看人衰，你做得好，大家不會廣傳。大家廣傳的都是一些不好看，或是Kai、戇居的東西。他們自比八、九十年代巨星，但前人是很盡力地用『藝』去娛樂我們，現在的大抵只是炒作話題居多，大家笑一笑就算，不會在乎或留意。不過他們也有可取之處，就是自信，自信到一定地步，就可以義無反顧。至於不足，我說出來也沒有用，因為他們不會覺得有不足。」

田中小百合

「樂壇青黃不接，有衝擊有話題係好事，你咪理佢幼稚或未Train好就出嚟，但起碼帶出新氣象，總好過現在主流樂壇只有一潭死水。你說MK Pop抄K Pop，但後者何嘗不是在J Pop與外國舞曲文化的基礎上發揚光大，只不過人家『山寨』得更好、模仿改進技術更高。跳唱組合於香港是稀缺品，但熱潮不能長久下去，MK Pop要突圍還需要讓人共鳴，若能做到如Shine或C AllStar般親近本土樂迷，他們就有機會打開缺口。」

各地「MK Pop」組合

所謂「道高一尺，Pop高一丈」，但原來除了香港，亞洲各地近期還有不少類似MK Pop新組合出現，歌藝舞技同樣「精湛」，分分鐘秒殺本地組合！

越南拳皇–HKT

由Hung、Kiet同Titi三位男生組成，造型參考自MK仔至愛的遊戲《拳皇》，MV在墳場取景更是騎呢度爆燈！

澳門S.H.E.–S.K.Y.

估唔到彈丸之地都有女子組合，唱功、舞步不俗，但網民笑稱她們腋下未清理好就拍MV，下次記得補粉了！

內地少時–藍寶石少女

山寨版少女時代，核心成員14位，年齡介乎16至22歲，主打單曲《加油歌》不少網友聽完後都說陣亡了。