北京直擊！7.9吋平板色誘「米」粉

由小米手機、小米盒子以至流動電池，幾乎所有小米產品都被用家搶購一空，依家又多樣必搶Item！講緊係剛於北京發布嘅小米平板，雖然佢叫價1,499人仔，但用上頂級規格，包括2,048×1,536解像度靚芒、最新NVIDIA四核心處理器等，性價比冠絕同級。新機預計於6月開始畀「米粉」（小米粉絲）公測，嚟到香港賣街時，各位冇理由唔搶番部啩？

全程發布會解說，由小米董事長雷軍一人包辦。

似放大版iPhone 5c

一如以往，發布會由小米董事長雷軍唱獨腳戲，先前傳聞嘅小米手機3S未見影蹤，反而傳足幾年嘅平板終於現身。新機直接叫做小米平板，雷軍話到明要複製iPad成功之路，所以新機無論7.9吋4:3屏幕、機身體積等，都同iPad mini接近，較特別係機背用上拋光塑膠物料，加上黑、白、粉紅、黃、藍、青6色選擇，驟眼睇十足放大版iPhone 5c。唯一要彈嘅係機背容易沾上指紋，幸好原廠備有磨沙機殼，配埋一齊手感勁正。

挑戰Retina靚芒

小米平板連解像度都有iPad mini嘅2,048×1,536級數，而像素密度亦達326ppi，配合Gorilla Glass 3強化玻璃，不僅顯示細緻，亮度及可視角度都超高，小記現場試睇電子書和影片都有上佳表現。屏幕解像度咁高，對處理器嘅要求自然提升，因此新機搭載新款Tegra K1四核心處理器，時脈高達2.2GHz，另一賣點係圖像處理能力超高，廠方表示新機於《AnTuTu》測試有近40,000分，比起其他Qualcomm頂級處理器嘅機款仲要高分。

現場花絮
發布會喺北京國家會議中心舉行，鄰近水立方等地標。

小米年度大事，當然有勁多「米粉」捧場，部分仲帶埋自製旗幟。

MIUI專用介面

小米以研發手機介面起家，其平板當然用番自家MIUI介面，不過廠方並非將手機介面直接移植至平板上，內裏還進行一連串優化。15個應用程式包括瀏覽器、設定介面、應用商店等全部經過改良，好似瀏覽器將常用嘅上一頁、書籤等按鍵，置於畫面左右兩邊，方便用家以拇指操控；設定介面則用上兩欄式設計，更清晰易用；而應用商店改用分頁設計，一掃便可轉到另一選項，並新增平板專區，搵Apps更就手。廠方表示，現有100款應用程式及400款遊戲適合小米平板使用，計劃年底將各增至1,000款。售價方面，以1,499人仔嚟講，折約港幣$1,900，比預期稍貴，不過比起賣$3,088嘅iPad mini平一大截。至於講抵玩嘅一定係64GB版小米平板，皆因它只比16GB版貴200人民幣。

在場設有體驗區供傳媒和米粉試玩產品，仲有專人講解。

場內300多個座位一早坐滿，後來因為人數眾多，連走廊都塞滿人！

為咗方便用家雙手使用，瀏覽器主要功能鍵置於畫面兩邊。

同場加映：49吋4K小米電視2

上年小米電視推出後叫好叫座，今年廠商繼續加碼兼升級，正式推出小米電視2，屏幕尺寸增大至49吋之餘，解像度亦升級至3,840×2,160嘅4K級數，顯示自然更細緻，配合4K圖像增強等技術，就算睇1,080p影片，顯示效果一樣提升。而新機屬於智能電視，內置1.5GHz四核心處理器、2GB RAM及支援802.11ac無線技術，加上採用MIUI TV系統，玩串流或Apps都一樣掂。小米電視2賣街時將會以套裝形式連音響組合發售，備有Soundbar及Subwoofer設計，前者內置6個2吋全音單元及2個1吋高音單元；後者則負責重低音效果，最正係可以藍芽無線連接，擺位方便得多。

機背鏡頭有800萬像素畫質，不過小記試拍時發覺對焦速度一般。

現場展示了多色原廠機殼，採用磨沙物料，手感唔錯。

應用商店設有平板專區，精選小米平板嘅Apps。

規格表

處理器：NVIDIA Tegra K1四核心2.2GHz

邊框採用全鋁合金物料，特別提供紅、粉紅、藍、紫、綠、金等多種配色。售價：3,999人民幣（5月27日於內地推出）	機底觸控版支援「尋找遙控器」功能，輕輕一掃遙控器便會「嗶嗶」響起。	採用圖像化內容介面，分別有電視、在線電視、遊戲中心等多個選項。
遙控器備有多個按鍵，最正係支援藍芽4.0。